На прес конференцијата во населбата Трајаново Трло, што ја одржаа кандидатот за градоначалник на Кочани, Зоран Тодоров и кандидатската листа за советници „За живот во Кочани“, беше речено дека во наредниот четиригодишен мандат посебно внимание ќе се посвети на унапредувањето на условите за живот на ромската заедница.
Зброувајќи за проектите што ќе се преземат на тој план, Мануела Саидова од кандидатската листа за советници нагласи дека ромската заедница во Кочани живее во услови кои не доликуваат на 21 век.
-Фекалии течат по улиците, калта е секојдневие, а депониите се насекаде. Сметот се собира еднаш месечно, децата играат покрај отпад, младите немаат спортски терени, а многу семејства живеат без основни услови за живот. Ова не е резултат само на сиромаштија или неодговорност, туку на долгогодишната негрижа и ад-хок политика за ромската заедница, во кој период за цело време во политиката се активни и сегашните мои опоненти, кои повторно со нивни ветувања, без срам и перде се појавуваат и на овие избори, со една единствена цел, повторно да го изманипулираат ромското население и повторно заедницата да тапка во место, како и во последните 20 години. Мојата визија е Кочани – град на еднакви можности и еднакви права, каде секој граѓанин живее достоинствено и има еднаков пристап до институциите. Санација ио ставање во функција на улиците: „Стамен Манов“, „Дуди Ханум“, „Славчо Стојменски“, „Митко Беќарски“ и „Шукри Шаин“, изградба на потпорни ѕидови и уредување на пристапните улички во „Колерските гробишта“ и Полатски пат, изградба на кракови за одвод на фекални и атмосферски води и пристап до чиста вода, редовно чистење на сите идентификувани депонии во ромската заедница и околината и хортикултурно уредување на тие локации, хортикултурно уредување – зеленило, клупи и осветлени пешачки патеки, посебно од сите пристапни страни кон ромкото маало, истакна Саидова.
Беше нагласено дека во програмата е предвидена поддршка на културата и промоција на соживотот во Кочани.
-Формирање Ромски културен центар во Кочани, организација на мултикултурен фестивал по повод 8-ми Април – Светскиот ден на Ромите, поддршка на фолклорни друштва, локални уметници, драмски групи и музички ансамбли, поддршка и соработка со сите граѓански здруженија, истакнати академски граѓани и активисти за проектни кои ке имаат влијание на стандардот и концептот на размислување. Менторски програми и стипендиски фонд за ученици и студенти, Центар за образовна поддршка – за најмалите ученици од одделенска настава со цел полесно да го совладаат македонскиот јазик и материјалот, формирање на посебни тимови од основните и средните училишта за психосоцијална поддршка на ромските семејства и помош да го идентификуваат образованието како висок приоритет за нив и нивните семејства, формирање младински хаб – простор за креативност, обука, дигитални вештини и активизам, организирање на воннаставни активности за учење и развој за возрасни лица, додаде Саидова.
На прес конференцијата стана збор из а здравството и економската сигурност на ромската заедница.
-Програми за здравствена едукација на жените Ромки, мобилна здравствена екипа во ромските маала, поддршка за стари и изнемоштени лица преку локален центар за дневна грижа, поддршка на женско претприемништво и микро-бизниси и отворање социјални претпријатија во ромската заедница со можност за вработување на лица во социјален ризик, заклучи Саидова.
Кандидатот за градоначалник Зоран Тодоров, нагласи дека во Кочани не треба да има никаква поделба меѓу граѓаните, без оглед дали се работи за национална, етничка, верска или каква било разлика.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
