Ученици од основното образование, како и деца со попреченост, денеска беа дел од спортско-забавниот настан „Игри без граници“ во ОУ „Никола Карев“, во рамки на проектот „Преку спорт до инклузивно и квалитетно образование“ што почна минатиот месец.
Целта на настанот е преку спортски игри, во кои се вклучени деца од Кочани и од соседните општини, да се промовира инклузивно спортско образование и да се потенцира дека во спортот не постојат разлики. Исто така, беше промовирана и спортската опрема што е набавена во рамки на проектот од која најголем дел е наменет за децата со попреченост.
На настанот присуствуваа амбасадорот на Република Бугарија, Жељаско Радуков, како и претседателката на Македонско-бугарската стопанска комора, Билјана Митева, кои ги поздравија присутните.
Настанот дополнително беше збогатен со присуство на фудбалери од фудбалските клубови „Осогово” – Кочани и „Светлост” – Зрновци.
Проектот „Преку спорт до инклузивно и квалитетно образование“ е финансиран од Бугарската развојна помош, го спроведува Македонско-бугарската стопанска комора, а партнер е ООУ „Никола Карев”.
Вредноста на проектот е 14.411 евра и ќе се реализира до крајот на оваа година.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
