Традиционално, секој последен викенд од октомври Паркот на Револуцијата во Кочани е собирното место за пчларите од целата држава, во рамки на 28. Денови на медот, чиј организатор е пчеларското здружение „Матица“.
Годинава на манифестацијата учесници се пчелари од повеќе региони на државата кои се претставуваат со сопствено производство на мед и други пчелни производи, а граѓаните можат да купат квалитетен мед од познати производители.
-Имаме околу дваесетина учесници од целата држава, почнувајќи од Охрид па до Пехчево, цела територија на Македонија. Ќе биде промовиран медот како производ од пчелите како здрава храна и останатите пчелни производи. Цел е граѓаните да се запознаат со бенефитите од медот како производ што треба да се консумира во текот на целата година за подобрување на имунитетот, истакна Борчо Атанасов, претседател на пчеларското здружение „Матица“ – Кочани.
Манифестацијата ја отвори в.д. градоначалникот на Кочани, Венко Крстевски при што нагласи дека Општината дава поддршка на пчеларството, а „Деновите на медот“ да добие меѓународен карактер.
Од Сојузот на пчеларски здруженија на Македонија нагласија дека изложбата на мед и пчелни производи е меѓу најстарите во државата, а потребна е поддршка од надлежните институции со оглед на проблемите со кои се соочуваат пчеларите.
-Условите од година во година се менуваат со климатските промени, многу можеби пчеларството е најпогодено. Оваа година мислам дека е нешто подобро, зависи од микрорегион до микрорегион, се слушаме со колегите и сепак приносите се подобри од ланската година. Во однос на поддршката од страна на Министерството за земјоделие добиваме од пчелно семејство по 600 денари или десет евра, сепак тоа е малку. Ние и како Сојуз и како потсекторска група многу често разговараме и бараме дополнителни поддршки. Меѓутоа, сега засега ја немаме. Нашиот сојуз беше еден од иницијаторите и основачите и формиравме Европски пчеларски сојуз. На 20 мај, на Денот на пчелата во Словенија беше дојден еврокомесарот за земјоделие Хансен и на тие разговори беше договорено дека дополнително уште по 10 евра треба да се добиваат субвенции за пчелите и пчелните семејства во однос на големиот придонес и опрашувањето на растенијата. Тој заклучок треба да се реализира во сите европски земји почнувајќи од следната година 2026 година. Ние како Сојуз бевме на 12 јуни, разговаравме со нашиот ресорен министер и му го кажавме меѓу другото и овој заклучок. Министерот се сложи дека ќе бидеме едни од првите што ќе го реализираме овој заклучок, па се надеваме дека тоа ветување ќе се реализира, истакна Менде Трајковски, претседател на Сојзуот на пчеларски здруженија на Македонија.
Освен мед и пчелни производи, на изложбата е претставена и опрема за пчеларство, како и заштитни препарати за пчелните семејства. Во музичко-забавниот дел на манифестацијата настапија ученици од ОУ „Св. Кирил и Методиј“, како и млади рок музичари од Кочани.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
