Родителите на загинатите во трагeдијата во клубот „Пулс“ јавно реагираа до Јавното обвинителство поради тоа што обвинети оствaруваат средби со оштетени лица со што можат директно да влијаат врз постапката.
Во обраќањето на 29. „Марш за ангелите“, што денеска се одржа во Кочани, родителите нагласија дека имаат докази за своите тврдења за што и јавноста била сведок.
-Пред точно три недели до вашата институција доставивме доказен материал — фотографии и видеа кои jacнo покажуваат како осомничениот, поранешниот градоначалник Ратко Димитровски и оштетеното лице седат заедно, со што е прекршена мерката на претпазливост. И покрај тоа, три недели подоцна, сѐ уште немаме никаков одговор. Ниту реакција, ниту преземена мерка, ниту барем знак дека некој воопшто се грижи за вистината и за правдата на нашите деца. А денес, повторно поднесовме нов доказ — фотографија и информација за нова средба, овојпат помеѓу осомничениот градежен инспектор Николчо Гоцев и оштетеното лице. Овој настан сериозно нѐ загрижува, бидејќи претставува уште едно прекршување на мерките и создава реална опасност да се влијае врз сведоците и оштетените, да се создаде притисок и страв, и да се загрози целата постапка и нејзината правичност. Кога се случи оваа трагедија, ни беше ветено дека Обвинителството ќе стои зад нас, дека ќе бидеме заедно во борбата за вистината и правдата. Ако во рок од една недела не добиеме jасен и конкретен одговор за преземените мерки по доставените докази, родителите се подготвени да преземат посилни јавни и организирани акции. Тоа значи интензивирање на мирните активности – организирани маршеви, jавни собири и други видови мирни, енергични мерки за да jа побараме правдата што ни следува, истакна Васка Лазарова, чиј син Андреј загина во трагедијата.
Родителите нагласија дека никогаш не барале насилство, туку инсистираат на мирни и законски начини за изразување на незадоволството. Затоа, јавно ги повикаа правосудните органи да постапат по доставените докази и да не дозволат незаинтересираноста или молкот да придонесат мирните маршеви да прераснат во масовни протести и блокади.
„Маршот за ангелите“ се одвиваше по вообичаената рута, од Паркот на Револуцијата кон Трговскиот центар и Управата за јавни приходи, а оттаму пред Полициската станица во Кочани. На кружниот тек кај двојниот мост имаше десетминутна блокада на сообраќајот, по што колоната продложи кон Основниот суд и Јавното обвинителство, а заврши на почетната позиција.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
