Дополнителниот заменик министер за информатичко општество и админстрација, Стефан Андоновски денеска беше во работна посета на Општина Кочани при што оствари средба со градоначачлникот Љупчо Папазов.
Се разговараше за унапредување на работата на администрацијата, како и за подобрување на дигитализацијата на услугите што ги дава Локалната самоуправа.
-За нас многу важни се два клучни аспекти, процесот на градење на достоинствена, ефикасна јавна администрација којашто ќе ги ужива сите права на работењето, но и што ќе нуди услуги на граѓаните коишто се брзи и нема да бидат обременети од корупција, непотизам и клиентелизам. Вториот аспект којшто е многу важен е процесот на дигитализација. Го гледаме како лек за корупцијата, поголема ефикасност на услугите, достапност, привлекување на нови странски и домашни инвестиции и за олеснување на процесот за дигитализација. Драго ми е што општина Кочани има одлични идеи и концепти каде треба да се развива процесот на дигитализација на општините. Знаеме дека во последните 6 години тој процес е запрен. Многу малку услуги се дигитализирани, но имаме желба, план и амбиции тоа да го направиме во периодот што следи, соопшти заменик министерот Андоновски.
-Се надеваме дека од она што ќе произлезе од средбата ќе имаме сериозна поддршка во делот на унапредување на работата на општинската администрација и дигитализацијата во функционирањето на службите во состав на општините, истакна градоначалникот Љупчо Папазов.
Дополнителниот заменик министер најави иницијатива за воведување посебни регистарски ознаки за службените државни и општински автомобили.
-Со специјалните регистерски ознаки на државните службени автомобили ќе се спречи злоупотребата за приватни и партиски цели. Во изминатите шест години службени возила често беа видувани како се користат за време на викенди, се патува надвор од државата со нив, а за сето тоа немаше одговорност. За да го спречиме ова, сакаме да воведеме специјална боја на регистарските ознаки на службените автомобили со што точно ќе се знае кој државен автомобил каде се наоѓа во моментот и дали некој го употребува или злоупотребува. Ќе воведеме и специјален регистар на автомобили во државна сопственост со што точно ќе се знае кој автомобил во која институција е распореден. Сметаме дека така ќе се стави крај на злоупотребата на возилата, истакна Андоновски.
Трошоците за изработка на новите регистарски таблички и за потребната документација би биле на товар на државните органи или институциите кои се сопственици на возилата.
-Планот сè уште не е целосно разработен, но тоа секако нема да биде на товар на граѓаните. Идејата не ни е да создаваме дополнителни обврски за нив или за државните институции, но мора да се заштитиме од злоупотреби, додаде Андоновски.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
