Граѓани и еко-активисти од Кочани денеска излегоа на протест против изградбата на мини хидроцентралата на Мала Река и против користењето на локалниот патен правец до браната Гратче.
Со транспаренти и делумна блокада на патот тие го изразија револтот што со градежните работи за хидроенергетскиот објект ќе се наруши биодиверзитетот во неговата околина, а од тешките товарни возила ќе се уништи асфалтниот коловоз до рекреативното подрачје во близина на градот.
-Издадена е дозвола за користење на патот што е наменет за лесни возила со тежина под пет тони, а веќе три месеци овде се движат возила со тешка машинерија за изградба на хидроцентралата. Исто така, издадено е позитивно мислење за градење на објектот без да се одржи јавна расправа. Фирмата инвеститор која ја гради хидроцентралата постојано укажува дека ја има целокупната документација, ние неколку пати го баравме записникот од јавната расправа, што никаде го нема. Од Општината добивме одговор дека тој всушност ни не постои. Поднесовме и пријава до Основното јавно обвинителство за ова, но таа беше одбиена, истакна Ана Симонова, еко-активистка од Кочани.
На протестот беше упатено и прашање до надлежните како е издадена дозвола за градба на објектот на локација што се наоѓа во заштитено подрачје, на ерозивно земјиште со свлечишта, што ќе предизвика еколошка катастрофа. Беше побарано и да се поднесат обвиненија за злоупотреба на службената должност за они кои дале согласност за користење на локалниот пат.
Протестите и блокирањето на патниот правец ќе продолжат и во наредните денови, сè додека не се стави забрана за користење на асфалтниот коловоз и додека повторно не се разгледа целокупната документација за изградба на мини хидроцентралата на Мала Река.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
