Издавањето риболовни дозволи за акумулацијата Гратче доцни, иако СРЗЕК „Кочански рибар“ во март годинава ја доби концесијата за риболов.
На електронското наддавање за концесија што го организираше Министерството за земјоделство, шумарство и водостопанство, кочанското здружение беше единствен апликант и понуди 11 отсто од вредноста на концесијата, по што понудата беше прифатена.
Постапката за официјализирање на концесијата е завршена, но поради технички проблем кај надлежните во Скопје, дозволи на риболовците сè уште не им се издаваат.
-Веќе е потпишан договор за концесија меѓу Владата и нашето здружение, а техничкиот проблем се појави поради потребата да се архивира годишната програма во Институтот за сточарство и риболов, но поради оправдано отсуство на архиварот не е завршена работата. Очекуваме во наредните два-три дена да биде готово. Не можеме да ги издаваме дозволите затоа што не ни е одобрено барањето за цена на дозвола, што ќе се заврши по доделувањето архивски број од мислењето од Институтот. Ќе нема промени, сè ќе биде како што беше одлучено на Собранието на Здружението, но тоа мора да биде официјално добиено. Цената на дозволите останува иста што ја донесовме на Собрание, но треба да биде одобрена, односно дневната ќе чини 300 денари, а годишната 1.500 денари, истакна Ивица Јорданов, претседател на СРЗЕК „Кочански рибар“.
Во претходните шест години Здружението успешно ги реализираше активностите што беа преземени како обврска со концесијата која беше добиена кон крајот на 2016 година.
Со добивањето на новата концесија за вештачкото езеро Гратче спортско-риболовното здружение „Кочански рибар“ ќе продолжи со организирано одржување и користење на рибниот потенцијал. Освен тоа, се презема и обврска за обновување на ресурсите и одржување на околината на езерото.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
