Ниту итната медицинска помош ќе биде брза, ниту противпожарното возило ќе стигне навреме да интервенира во случај на пожар ако треба да поминат во четврток по улицата „Гоце Делчев“. Во вообичаен пазарен ден околу 9 часот наутро, за да извози растојание од 50-тина метри на противпожарната екипа ѝ се потребни 7 минути, а за да стигне од мостот кај плоштадот до џамијата нема да бидат доволни ниту над 20 минути.
Вакви поразителни бројки покажа денешната пробна акција што ја спроведе комуналната инспекциска служба на Општина Кочани, во соработка со Територијалната противпожарна единица и Полициската станица, а со која беше поставена задача противпожарното возило да помине низ пазарот за што пократок период за да реализира можна интервенција.
Натрупаните импровизирани тезги на самиот коловоз на „Гоце Делчев“ го попречија возилото кое мораше да чека да се поместува одделно секоја тезга кон тротоарите. Ефикасноста во случај на вистинска потреба за интервенција ќе биде катастрофална.
Од комуналната инспекција истакнаа дека во наредниот период ќе се прават редовни контроли, а растојанието меѓу тезгите треба да биде најмалку 3 метри. Во спротивно, ќе следуваат соодветни санкции. Ние би додале: за волја на вистината, акциите ги имаше и порано, но резултатите од нив се чиста нула.
Јасно е дека проблемот со локацијата и со функционирањето на градскиот пазар, особено во четврток, е сериозен и комплексен и не може да се реши со кампањски активности. Прашањето за негова целосна дислокација е актуелно со децении, но ниедна локална власт до сега не се зафати за изнаоѓање трајно решение. Пред четири години имаше иницијатива за тоа, но во практика не се спроведе до денес.
За разлика од Кочани, некои од соседните градови, најдоа соодветни решенија за дислоцирање на пазарите од централното градско подрачје. Затоа, прашање е дали навистина пазарот кај нас и во иднина треба да остане таму каде што е или би можело да се размислува за друга посоодветна локација.
По завршувањето на денешната контролна акција, состојбата на улицата „Гоце Делчев“ се врати по старо.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
