Во рамки на проектот и програмата за економско јакнење на жените, денеска во Кочани се одржа предавање „Гласот и учеството на жените и младите во креирање јавни политики и овозможувачка средина за граѓанско учество“, а темата беше препознавање и заштита од семејно и родово базирано насилство.
Настанот е дел од „16 дена активизам против родово базирано и семејно насилство“, како партнерски проект за активно учество на жените на пазарот на труд преку организирање бесплатни курсеви за зголемување на можностите и потенцијалите на жените за вработување и самовработување.
Носител е Женската граѓанска иницијатива „Антико“ – Скопје и проектните партнери – Здружението за мултикултурна афирмација и едукација на жените и младите во руралните средини „Секогаш соживот“ од прилепското село Канатларци и Здружението за образование и култура „Адрион“ од Желино, во соработка со Општина Кочани.
-Се работи за активност што се спроведува на светско ниво и почнува на 25 ноември и ќе трае до 10 декември, а нашите напори се елиминирање на секаков вид насилство врз жените, меѓу кои е и семејното насилство. Целта е да се подигне свеста во јавноста против насилството воопшто, како тоа да се препознае и да се искористат механизмите за заштита. Со проектот се опфатени десет општини во сите региони во државата, при што освен во Кочани, слични предавања веќе имаше и во селата Канатларци и Могила, а во тек се во Тетово. Во текот на идната година курсевите ќе продолжат во уште шест општини, истакна Умуѓулсум Јусуфоска од Здружението „Секогаш соживот“.
Во рамки на проектните активности се работи на зголемување на пристапот на жените до едукација и образование преку професионални повеќемесечни курсеви, односно обуки за развивање вештини и компетенции што ќе овозможат тие да бидат поконкурентни на пазарот на труд. Курсевите во Кочани главно беа за фризерски услуги и веќе се завршени, а наскоро ќе им бидат доделени сертификатите на учесничките.
Проектот е поддржан од Швајцарската влада преку Цивика мобилитас.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
