Казна доживотен затвор му е изречена на 59-годишниот У.Р. од Кочани, кој на 25 септември минатата година со повеќе убоди со нож усмрти 46-годишна жена пред нејзиниот дом.
Основното јавно обвинителство во Кочани поднесе обвинение за случајот, а во судската постапка осомничениот ја признал својата вина. Основниот суд – Кочани донесе пресуда за изрекување казна доживотен затвор за убиство што е извршено при родово базирано насилство и на свиреп начин.
-Во обвинението, Основното јавно обвинителство – Кочани го товареше обвинетиот и за кривично дело – Уцена кон истата оштетена, сторено пред убиството. Меѓутоа тоа дело обвинетиот не го призна, постапката е раздвоена и за тој дел од обвинението ќе продолжи судска постапка, се истакнува во писменото соопштение од Јавното обвинителство.
Загрижена за својата безбедност 46-годишната Т.М. на 16. мај минатата година во Полициската станица во Кочани пријавила дека подолг период била уценувана од У.Р., со кого била во љубовна врска, дека тој ќе објави компромитирачки фотографии и видеа доколку не му даде пари. Инспектори од Надворешната канцеларија за криминалистички работи при Одделението за внатрешни работи – Кочани постапиле по пријавата и доставиле соодветна пријава до Основното јавно обвинителство – Кочани.
Граѓанските организации кои работат на заштита и поддршка на жртвите од семејно насилство, особено кај жените, реагираа дека надлежните институции тешко ги препознаваат ризиците од фемицид.
-Некогаш пријавите ги регистрираат како поплаки и не преземаат ништо, иако се должни да направат проценка колкав е ризикот за безбедноста и сигурноста на жената која пријавува каков било обид за насилство. Агонијата на жената од Кочани траела седум години, а нејзината пријава не била сфатена сериозно. Ако се прави подобра проценка на ризикот, ќе можеме да ги антиципираме случаите каде што постои опасност од фемицид, односно убиство, истакна Благица Кирова од Едукативно-хуманитарната организација ЕХО од Штип.
Според законските одредби уцената се смета за сериозно кривично дело за кое е предвидена затворска казна до пет години, а со оглед на свирепото убиство со повеќекратни убоди со нож, Судот донесе пресуда за максимална казна.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
