Поминаа три ипол години откако железничката станица во Кочани е опустена и не доаѓаат ниту патници, ниту возови. Патничкиот воз на релацијата Скопје – Кочани овде за последен пат беше виден во април 2021 година. Пероните на станицата се напуштени, а граѓаните користат други видови превоз, што за волја на вистината се побрзи и поефикасни.
Според официјалното известување што за Канал 8 го дадоа од Акционерското друштво за железнички транспорт неколку месеци по прекинот на сообраќајот, релацијата кон Кочани не била опфатена со измените во возниот ред поради тогашните мерки со Ковид состојбата и спроведувањето на полицискиот час. Иако сите превентивни мерки и ограничувања во врска со пандемијата веќе се заборавија, патничкиот воз не се врати на редовната линија.
Дополнително, како една од причините за прекинот на патничкиот превоз по железничката линија кон Истокот, беше наведен дефектот на локомотивата чие сервисирање се најавуваше да заврши пред три години. Во меѓувреме стана очигледно дека во прашање се сосема други причини за тишината на железничките станици и постојки на правецот од Велес кон Кочани.
При денешната посета на Велес, заменик претседателот на Владата и министер за транспорт, Александар Николоски доби новинарско прашање дали се размислува за повторно активирање на пругите кон Кичево и Кочани.
-На линијата Скопје – Тетово – Кичево за жал во моментов нема сообраќај, имајќи предвид дека не е електрифицирана, а дизел локомотивите се скапа работа за одржување. Истата приказна е и со Штип – Кочани. Тоа е една од работите коишто ги работиме со „Македонска железница – Инфраструктура“ – целосна електрификација на постојните пруги, затоа што во моментов економска каква-таква исплатливост има само за Коридорот 10, којшто е целосно електрифициран, истакна Николоски.
Засега во Министерството за транспорт нема план ниту за набавка на нови возови и локомотиви, туку се планира постојните да се репарираат и да се стават во функција. Во меѓувреме изнајмени се четири воза од Србија, но тие нема да се користат за превоз на патници, туку за карго транспорт.
Од одговорот на министерот може да се заклучи дека поради високите трошоци за електрификација и обновување на пругата, по шините кон Кочани уште долго нема да помине воз.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
