Со верификацијата на мандатите и со давање и потпишување на свечената изјава на секој од избраните советници, денеска беше конституиран составот на новиот Совет на Општина Виница.
На почетокот на седницата верификацијата на мандатите беше направена за 14 од избраните 15 советници, колку што брои Советот, а беше даден предлог мандатот на советникот Имит Скопко да биде верификуван на првата наредна седница. На конститутивната седница присуствуваше и досегашниот претседеател на Советот, Ацо Ѓорѓиевски кој даде поддршка и насоки во начинот на работење на советниците.
Една од првите точки на седницата беше избор на претседател на Советот, а кандидационата комисија го предложи советникот Гоце Василев од листата на коалицијата предводена од ВМРО-ДПМНЕ. Со едногласна поддршка од присутните 14 советници тој беше избран за претседател, по што даде и кратка изјава.
-Ви благодарам на поддршката и за довербата да бидам избран на оваа функција. Од денеска понатаму, со преземањето на обврските, односно со преземањето на позицијата претседател на Советот на Општина Виница или прв меѓу еднаквите, ветувам дека ќе ја исполнам задачата во целост, она што ни беше дадено како мандат од нашите сограѓани. Ветувам дека како претседател на Советот ќе ги запазиме сите законски прописи, ќе работиме согласно Статутот на Општина Виница и деловникот за работа на Советот на Општина Виница. Сакам да ви посакам успешна и плодна работа, Советот да остане храм на демократијата каде првенствено ќе се носат одлуки во интерес на граѓаните, а личниот и каков било друг интерес да го ставиме настрана и интересот на граѓаните да ни биде императив. Впрочем за тоа сме избрани. На градоначалникот Митко Костадиновски исто така да му посакам успешен и плоден мандат и да искористам приликата да се заблагодарам и на досегашните досегашниот советнички состав и на претходниот градоначалник Миле Петков, истакна Василев.
Од опозициската советничка група истакнаа дека му даваат поддршка на новоизбраниот претседател, но таа нема да биде безрезервна, односно Василев ќе ја има сѐ додека работи непристрасно, без политички влијанија и во интерес на граѓаните.
-Од страна на опозицијата сакам да пренесам дека во овој момент ние ќе подадеме рака и ќе гласаме за изборот на претседател на Совет на Општина Виница, којшто предложен од страна на позицијата. Сакам да знае идниот претседател на Советот дека ова не е безрезервна поддршка. Сѐ до моментот додека подеднакво и непристрасно се однесува кон работата и кон интересните на граѓаните на Општина Виница ќе ја има целосната наша поддршка. Сум бил советник и во друг состав на Советот на Општина Виница, обично работата не одела мазно, имало пристрасност, но очекувам ние тоа од денеска да го надминеме и таа пристрасност и партиските бои да ги оставиме зад себе и да работиме во интерес на граѓаните. Затоа уште еднаш ќе спомнам, ќе ја имате нашата поддршка, но очекувам и вие понатака да ја оправдате таа поддршка што денеска ќе ви ја дадеме, истакна советникот Венцо Вуинов.
На седницата на беа формирани и комисиите кои се дел од Советот и ги разгледуваат предложените точки за расправа на пленарните седници, а исто така беше усвоен и предлогот за овластување советници кои ќе присуствуваат на склучувањето бракови.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
