Општина Кочани ја почна примената на новиот сообраќан режим на улиците „Маршал Тито“ и „Кеј на Револуцијата“, со што се менува насоката на движење на возилата.
Поставувањето на сообраќајните знаци привршува, со што возачите ќе бидат информирани и предупредени за измената што е направена, истакнаа од стручната служба во Локалната самоуправа.
Увид во новиот сообраќаен режим направи градоначалникот Владко Грозданов, при што ги повика учесниците во сообраќајот да ги почитуваат прописите.
-Од овој момент стартува новото сообраќајно решение во Кочани што го претставивме пред некој ден и од кое очекуваме подобрување на движењето, подобра циркулација, побрз проток и побезбеден пристап. Сообраќајното решение не е комплицирано, од кружниот тек кај Полициската станица во насока југ кон север, по улицата „Кеј на Револуцијата“ до плоштадот, сообраќајот ќе се одвива во една насока. Од другата страна на реката, по улицата „Маршал Тито“ сообраќајот исто така ќе се одвива во една насока, од плоштадот кон двојниот мост, односно од север кон југ. Ова сообраќајно решение не е од вчера, овој проект се работи неколку години во кој свое учество имаат многу стручни лица, експерти во оваа област, граѓански здруженија, многу други консултантски бироа. Очекуваме да го добиеме посакуваниот ефект и барам од граѓаните соработка со службите и со институциите, како и трпение за измените. Се надевам на многу подобро регулирање сообраќајот во Кочани, истакна градоначалникот Грозданов.
Измената на сообраќајниот режим на двете улици во централното градско подрачје се прави по околу осум години, откако претходно имаше слично решение за „Кеј на Револуцијата“.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
