Министерството за финансии обезбедило 100 милиони денари со кои ќе се откупат 2.400 тони оризова арпа, односно 1.300 тони бел ориз за потребите на државните стокови резерви.
На вчерашната 43. седница во Собранието во редовна постапка е усвоена Програмата за дополнување на среднорочната програма за формирање, чување, обновување и користење на стоковните резерви, што претходно ја предложило Министерството.
Количините што ќе бидат откупени за оваа намена се нешто помали во однос на најавуваните 3.000 тони арпа. Според пресметките, со откупените количини бел ориз за стоковите резерви ќе се обезбедат потребите за двомесечна потрошувачка од овој прехранбен производ во државата.
Откупот на оризовата арпа во кочанскиот регион е сериозно отежнат, односно е во застој поради проблемите со пласман на пазарите во соседните земји, кои обезбедиле бел ориз по пониски цени од други држави. Според проценките, сѐ уште неоткупени се околу 10 илјади тони арпа од минатогодишната реколта. Откупно-преработувачките претпријатија се пожалија дека и оние количини што веќе ги откупиле не ги преработуваат и им стојат на залиха.
Претходно од Владата истакнаа дека оризот како култура, која е од исклучително значење за населението во земјата и погодна за чување како стоковни резерви, е опфатен со последните измени и дополнувања на Законот за стоковните резерви.
Стоковните резерви се формираат од производи кои се од исклучително значење за животот на населението и се користат во случај на воена состојба, вонредна состојба, елементарни непогоди, еколошки катастрофи, како и при поголемо нарушување на пазарот.
Покрај оризот, за потребите на стоковите резерви се откупуваат и пченица, пченка, јачмен, прехранбена сол, сурово сончогледово масло, нафтени деривати, лекови и медицински средства.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
