Во просториите на Општина Кочани се одржа работна средба меѓу градоначалникот Љупчо Папазов и заменик министерот за односи меѓу заедниците, Неждет Мустафа, на која присуствуваше и членот на Советот на Општината, Аки Акиов.
На средбата се разговараше за изнаоѓање олеснителни можности за повторно приклучување на мрежата за електрична енергија на семејствата во Старата касарна. Исто така, тема на разговор беше и начинот на исплата на заостанатите неплатени сметки за струја на жителите од улиците „Стамен Митов“, „Шукри Шаин“, „Митко Беќарски“, и „Славчо Стојменов“.
Констатирано е дека на овие улици е неопходно подобрување на квалитетот на услугите за користење електрична енергија, особено во однос на стабилноста, квалитетот и сигурноста во дистрибуцијата на истата.
Договорено е екипи на ЕВН Македонија – КЕЦ Кочани најдоцна за десетина дена повторно да го приклучат објектот Стара касарна на електричната мрежа. Притоа, наместо досегашните дрвени столбови, ќе се постави подземен кабел. Од своја страна Општина Кочани ќе ја исполни донесената одлука на седница на Совет според која, на секое семејство кое живее во овој објект месечно ќе му плаќа по 100 киловатчасови електрична енергија, а секоја потрошена количина над овој износ семејствата ќе треба сами да ја плаќаат. На средбата беше разгледана и договорена можност да се обезбеди привремено сместување на друга локација за семејства од Стара касарна, сѐ до изградбата на типските објекти кај Фарбиката за вода, за што Владата и Општината од сопствените буџети пред 5 години обезбедија околу 21 милион денари, истакна советникот Акиов.
Исто така, ќе се работи на подобрување на стабилноста и квалитетот на електричната енергија што се испорачува преку мрежата на претходно споменатите улици.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
