Здружението „16 март 2025 – Кочани“ изготви технички проект за изградба на спомен обележје на Пониква, а што ќе биде посветено на загинатите во трагедијата во клубот „Пулс“.
Според техничката документација, спомен обележјето со називот „Ангели“ треба да биде изградено во непосредна близина на локалитетот Аеродром на Пониква, во катастарската општина Јастребник.
Се работи за монумент со парковско уредување на површина со димензии 30 на 40 метри, во кој треба да се постави вертикален метален столб со височина од 9 метри, да се изгради мал параклис, да се постават клупи и да се засадат дрвја со придружно хортикултурно уредување на просторот.
Градежно-техничката документација ја подготви проектантската компанија „Концепт ЕУ“ ДОО – Кочани.
Идејата за изградба на монументот е на Тошо Антов, член на Здружението „16 март 2025 – Кочани“, чија единствена ќерка Ивона настрада во трагедијата.
-До моментот кога ја дознавме кобната вистина за нашата ќерка бевме среќно семејство со многу планови за иднината. По трагичната ноќ, останавме во неверување, потресени, изгубени и во шок од загубата, без патоказ како да продолжиме понатаму. Таа беше личност која секогаш помагаше и правеше сè за своите другарки, поради што размислував како да се направи нешто за спомен на неа и за сите трагично загинати на тој 16 март. Идејата за спомен обележјето е моја и тоа ќе биде единствено од таков вид во државата и пошироко, на толкава надморска височина. Ивона беше планинарка и сакавме монументот да биде во природа, во планинска тишина, секој да може да го посети и да оддаде почит на нашите деца, истакна Антов.
Здружението веќе добило согласност од Јавното претпријатие за државни патишта, од каде оцениле дека според приложената документација може да се реализира планот без да се навлегува во зоната на регионалниот пат Р1309. Притоа се напоменува дека влезот на просторот каде што ќе биде лоциран споменикот не треба да биде директно од патниот правец. Со оглед на пространата локација, може да се обезбеди доволно простор за паркирање возила, како и за дополнителни содржини во иднина.
Барањето за согласност е доставено и до Советот на Општина Кочани, по што општинската администрација треба да издаде решение за поставување урбана опрема, за да може да се реализира целата идеја.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
