Седум земјоделски региони од исто толку европски држави, меѓу кои е и Македонија се вклучени во партнерскиот проект AgriExcel со кој ќе се реализираат активности за дигитална трансформација во земјоделството.
Македонски партнер во проектот е Кочани, заедно со регионите на Тревизо во Италија, Стирија во Австрија, Осона во Шпанија, Стара Загора во Бугарија, Виџем во Летонија, како и Универзитетот за применети науки ЈАМК од Финска, кој е носечки партнер на активностите.
Кај секој партнер бидат опфатени специфичните регионални предности и приоритети за дигитализација, при што во Кочани вниманието е насочено кон потенцијалот на геотермалната енергија во земјоделството и одржливиот локален развој, како дел од Стратегијата за локален економски развој на општина Кочани за периодот 2024 – 2027 година.
Проектот AgriExcel треба да ги обедини регионите за да ја забрза дигиталната трансформација во агропрехранбениот сектор што се смета за една од најкритичните и недоволно дигитализирани индустрии во Европа. Практично производителите на храна во земјите на ЕУ се соочуваат со климатски притисоци, нестабилност на глобалниот пазар и потреба за поголем раст со помалку ресурси.
-Технологиите како што се паметните сензори, автоматизацијата, вештачката интелигенција и земјоделство базирано на податоци нудат вистински решенија. Но, во многу региони, особено руралните, овие алатки остануваат недоволно искористени поради ограничениот капацитет за иновации и недостатокот на соработка помеѓу технолошкиот и агропрехранбениот сектор. Целта е да го промениме тоа преку поддршка на креаторите на политиките, на иновативните центри и на засегнатите страни во агропрехранбениот сектор преку забрзување на усвојувањето на паметната агротехнологија. Притоа, ги насочуваме регионите кон заедничко креирање мисии за дигитални иновации прилагодени на нивните приоритети, поддржуваме воведување на модели за одржливо земјоделство базирани на податоци, го олеснуваме учењето и подобрување на политиките со прекуграничната соработка и промовираме нови начини за поврзување на истражувањето, бизнисот и управувањето во екосистемите за рурални иновации, се нагласува во приоритетните цели на проектот AgriExcel.
Регионите кои се вклучени во проектот контактот и обуките ги остваруваат електронски преку т.н. вебинари, а Ќе следат серија регионални состаноци со засегнатите страни, по што сите заедно ќе имаат студиска посета во Летонија во септември.
Вкупниот буџет за реализација на проектот изнесува близу 1,6 милиони евра, а имплементацијата ќе трае до крајот на јули 2029 година.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
