На патниот правец кон Пониква на Осоговските Планини денеска се одржа меѓународната автомобилистичка рели трка, што се бодува за шампионатот на Централноевропската зона на Светската автомобилистичка федерација, како и за домашниот шампионат за ридско-брзински натпревари.
Организатор на трката беше Автомобилистичката федерација на Македонија со техничка поддршка од авто-клубот „Перформанс“ од Скопје и Здружението на возачите – Кочани.
Дваесетинaта пријавени учесници, возеа на патека долга 5,3 километри, а стaртот беше од над градската депонија до рамнината на регионалниот пат кон Пониква, пред Шумската куќа.
Најдобар во првата трка беше Гентијан Шакири, во категоријата прототип формула, со остварено време од 3 минути и 26 секунди, додека во втората, прв до целта пристигна Бојан Петрушевски од тимот АК „Перформанс“ со своето возил „сеат ибица“, класа Е1 2000 кубни сантиметри, кој ја измината патеката за 3 минути и 30 секунди.
-Натпреварот со тренинзите и техничкиот преглед вчера помина во најдобар ред. Имавме само еден застој поради излетување од патот на едно возило. Денеска, исто така натпреварот помина во најдобар ред. За овогодинешното издание на „Пониква 2024“ имавме пријавено 20 учесници, од кои 16 го завршија натпреварот. Имавме учесници од државтата, како и од Србија, Косово и Хрватска. Можно е оваа година да организираме и уште еден натпревар, сметам дека и догодина овој настан ќе влезе во работниот календар на Автомобилистичката федерациај, истакна Павле Доневски, делегат на натпреварот.
Првата трка од „Пониква 2024“ почна во 10 часот, а час подоцна се реализираше и вториот дел од ридско-брзинскиот натпревар. Поддршка за авто-рели трката даде и Министертвото за спорт.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
