Во текот на февруари жителите на општина Чешиново-Облешево ќе треба да определат кој проблем во нивните населени места им е приоритетен за решавање до крајот на оваа година.
Денеска граѓаните ја имаа третата сесија од програмата Форум во заедницата, во рамки на проектот „Зајакнување на општинските совети“, на која беа претставени пет предлог-проекти од областа на инфраструктурата.
За реализација на одбраниот предлог, за кој ќе се гласа на следната форумска сесија во февруари, Локалната самоуправа ќе добие 40 илјади долари како грант од Швајцарската агенција за развој и соработка, а предвидено е и кофинансирање од општинскиот буџет.
-Првиот предлог-проект е изградба на автобуски постојки, вториот е изградба на простор за детско игралиште во градинката „Ѕвездички“ – Чешиново, третиот предлог-проектие реконструкција на патниот правец Облешево-Спанчево со уредување банкини, четвртиот е изградба на детски паркови, набавка и поставување содржини во парковите во Облешево и Теранци и последниот, петтиот проект е изградба на нова бушотина за вода кај повеќенаменското игралиште во село Облешево. Ќе се одлучува на следната форумска сесија, а последниот рок е 15 февруари до кога треба да бидат завршени сите форумски сесии. Граѓаните очекуваат овие средства кои што се од Швајцарската амбасада, од околу 40 илјади американски долари, заедно со 20 отсто учество од Општината да бидат соодветно потрошени. По одлучувањето за избраниот проект ќе се пристапи кон распишување на тендерски постапки за реализација и се очекува некаде пред почетокот на локалните избори да биде завршен, истакна Јорданчо Костадинов, комодератор на форумските сесии во Чешиново-Облешево.
Градоначачникот Далибор Ангелов нагласи дека сите пет проекти се важни, но треба да се внимава при изборот затоа што Општината е во лоша финансиска ситуација за да може целосно да го кофинансира избраниот проект.
-Треба да бидеме практични во тој дел и да знаеме дека проектната документација ќе треба да ја изготви самата Општина, со тоа што ќе треба да се направи измена во планот за 2025 година. Со оглед на финансиската ситуација, знаете дека сѐ уште работиме со блокирана сметка и средствата многу домаќински ги користиме, затоа внимавајте околу тој момент, за да не се соочиме, односно да се доведеме во ситуација да не можеме да ги искористиме и тие 40 илјади долари што ни стојат на располагање, истакна градоначалникот Ангелов.
Проектот „Зајакнување на општинските совети“ е со цел да се зголеми транспарентноста и отчетноста на локалната власт преку поддржување на општинските совети при вршење на нивната функција, особено во надгледувањето на локалниот буџет. Општините треба да имаат поголема отвореност и инклузивност, за да се зголеми јавната доверба во локалните институции.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
