Во рамки на одбележувањето на 11 Октомври – Денот на македонското востание, дел од кандидатите за градоначалник на Општина Кочани, членови на кандидатските листи за советници, како и претставници од Здружението на борците од народноослободителната и антифашистичка војна и Здружението „Јосип Броз Тито“ положија свежо цвеќе на Споменикот на слободата и на спомен бистите на првоборците Љупчо Сантов и Раде Кратовче во Паркот на Револуцијата.
На скромното одбележување на празникот присуствуваа и актуелниот в.д. градоначалник и членови на Советот на Општината, кои и за претстојните локални избори се кандидати за истите функции.
По оддавањето почит кон борците кои го дале својот живот во борбата за слобода, кандидатите за градоналачалник Игор Христов и Владко Грозданов им го честитаа празникот на сите граѓани.
-Горд сум човек којшто потекнува од семејство чиишто предци биле револуционери и партизани. Слободата денеска во овој брановит свет претставува мислена именка каде што особено во местата каде што има жаришта на војни. Ние, граѓаните на Кочани и на Македонија го имаме тој благодет благодарение на жртвите од Втората светска војна да ја уживаме слободата којашто денеска царува во Република Македонија, а за којашто треба да се грижиме и понатаму во континуитет да егзистира. На денешниот ден недостасуваат младите коишто се вклучени во нашата програма, недостасува еднодневна екскурзија на најмалите на Споменикот на слободата, недостасуваат симболите на Република Македонија, како што е државното знаме и знамето на Општина Кочани. Денеска недостасува држењето на историски час, културно уметничките друштва денеска не се претставија, ова беше шанса да ги видиме нашите спортски таленти, па макар и преку ревијален натпревар, да ја слушнеме македонската борбена песна којашто одамна не се слуша. Во нашата програма имаме планирано вклучување на младите на голема врата преку промена на овој концепт на сувопарно положување цвеќе. Доколку граѓаните на Општина Кочани ја увидат нашата енергија, нашата креативност, нашата способност сето тоа да го промениме, ги повикуваме на 19 октомври масовно да излезат и да го заокружат бројот пет за градоначалник на Општина Кочани и бројот пет за листата за советници предводени од коалицијата на Социјалдемократскиот сојуз на Македонија. Сакам да го честитам празникот на сите граѓани на Република Македонија, да живее 11 Октомври, да живее Македонија и борбата за слобода и понатаму да царува во Република Македонија, истакна кандидатот за градоначалник Игор Христов.
-Денес го одбележуваме 11 Октомври – Денот на народното востание. Со гордост и чест се присетуваме на нашите храбри борци кои достоинствено го дадоа својот живот за нашата држава, но и секако ја преземаме одговорноста за иднината. Слава им, нека ни е честит Денот на народното востание, да живее Република Македонија, рече кандидатот за градоначалник Владко Грозданов.
Членовите на Здружението на борците, честитајќи го празникот во писменото обраќање нагласуваат дека македонскиот народ ја завршил Втората светска војна со околу 25.000 загинати борци и жртви на фашистичкиот терор, а 11 Октомври е ден од македонската историја, како симбол на македонската борба за слобода. Затоа наша должност останува да го чуваме она за што тие го дале својот живот, да се потсетуваме и да им оддаваме почит и на околу 100 борци од Кочани и Кочанско кои ги положија своите животи на олтарот на слободата.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
