Деновиве, на општинската зграда е поставена мерна станица за следење на квалитетот на воздухот на подрачјето на општина Кочани.
Параметрите за квалитетот на воздухот, температурата, ветерот и други метеоролошки податоци можат да се следат на веб-страницата на Општина Кочани на линкот: https://ekodata.live/?page=kocani&module=cards
Поставувањето на апаратурата е во рамки на активностите за следење на состојбата со загаденоста на воздухот, но податоците што ги покажува мерната станица се загрижувачки – ако навистина се точни.
Според податокот за присуство на јаглерод моноксид, денеска во периодот околу 14 часот можеше да се прочита дека во околината на Општината има нездраво количество од гасот во износ од 21,25 милиграми на метар кубен, додека азот диоксид имаше во умерена количина од над 154 микрограми на метар кубен. За дневната температура мерната станица покажуваше 34 степени Целзиусови, со опис дека тоа е пријатно време.
На истата веб-страница има информации и за состојбата со воздухот за локација на булеварот „Тодосија Паунов“, во источниот дел на градот, на излезот кон Оризари, а таму податоците се уште понеповолни. Присуството на јаглерод моноксид е многу нездраво со 24,17 милиграми на метар кубен, а температурата во истиот временски период покажуваше 17 степени Целзиусови, со опис дека е умерено свежо. Само кај азот диоксид има одлични резултати од 3,83 микрограми на метар кубен, што се оценува како добро.
Необично е што податоците што ги покажуваат двете мерни места се дијаметрално спротивни и прашање е кому и дали воопшто можат да му користат. Прашање е и како тие ќе се искористат во креирањето мерки против актуелната состојба со квалитетот на воздухот во Кочани. Затоа што, ако до неодамна еден од загадувачите беше „Пејпар мил“, последниве месеци состојбата е алармантна поради чадењето од Градската депонија. Граѓаните на Кочани и без мерна станица знаеја дека дишат нечист воздух, а за жителите на Бели и да не спомнуваме.
Според она што сега го покажуваат, најверојатно податоците ќе треба да се земаат со резерва при анализата на загаденоста, а особено во делот на температурата на воздухот.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
