На спортските терени во дворот на ОУ „ Св. Кирил и Методиј“ викендов се одржа второто издание на турнирот во баскет „3×3“.
Годинава учествуваа 16 екипи од државата, а вкупниот износ на наградниот фонд изнесуваше 100 илјади денари.
Победник на турнирот беше екипата на „Фурија“ од Битола, која како награда доби паричен ваучер од 60 илјади денари. Второпласирани беа момчињата од екипата „Кино Влае“ од Скопје кои добија 30 илјади денари, а третото место го освои „Дружината на Вацко“ на која и припадна ваучер од 10 илјади денари. За најкорисен играч, односно МВП на турнирот беше прогласен Александар Јовановски.
-Ова е втора година како го одржуваме овој турнир. Годинава го подигнавме малку на повисоко ниво затоа што ни се пријавија 16 екипи, при што девет се од другите градови од државата. На турнирот имавме и претставник од Франција, кој е еден од најдобрите во неговата земја. Исто така, имаме гости од Србија и Црна Гора кои играат во екипата на „Кино Влае“ и тие беа фаворити да го освојат турнирот. Се надеваме дека и понатаму ќе продолжиме со организација на овој настан и секако да прерасне во традиционален. Натпреварите поминаа во одлична атмосфера, истакна Љубомир Игнатов дел од организацискиот одбор.
Целта на турнирот е да се развие спортската свест кај граѓаните, како и да се збогати културно-забавниот и спортскиот живот на локално ниво. Датумите за одржување се одбрани поради самата симболика, односно 7 Септември – Денот на ослободувањето на Кочани и 8 Септември – Денот на независноста на Македонија.
За забавната програма се погрижија раперот Тони Зен и повеќе DJ артисти. Настанот беше поддржан и од Локалната самоуправа на Кочани.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
