Со кошаркарски натпревар меѓу екипи од повредените во пожарот во „Пулс“ и пораки за побрзо оздравување, во Кочани се одбележува една година од Трагедијата.
Настанот, кој ги собра преживеаните, институциите и граѓаните, послужи како потсетник за научените лекции, но и за силната волја на младите луѓе кои продолжуваат со својата рехабилитација.
Еден од присутните на денешниот натпревар беше и Драган Давитковски, кој во кобната ноќ бил во дискотеката со својата сопруга и пријатели. Тој со тага се присетува дека на нивната маса животот го загубиле двајца негови блиски. Давитковски сè уште се справува со последиците од повредите, но вели дека мора да се гледа напред.
-Имам повреди, изгореници и внатрешни повреди. Сега одиме на ласер во Скопје, а пулмолози редовно нè прегледуваат тука во болницата во Кочани. Првите денови беше потешко, сега сме подобро. Животот во Кочани продолжува малку тешко, ама мора да продолжи, изјави Давитковски, посакувајќи им на своите другари побрзо оздравување.
Министерот за здравство, Азир Алиу, истакна дека државата останува посветена на поддршката на овие млади граѓани, не само преку здравствени услуги, туку и преку системски решенија. Тој информираше дека веќе е објавена првата Национална стратегија за справување со масовни жртви, со цел институциите да бидат подготвени за брзо делување во реално време.
-Свесни сме дека државата мора да стои зад семејствата и младите кои поминаа низ ваков трауматичен период. Дел од нашите граѓани ќе одат на лекување надвор од државата за услуги за кои тука немаме експертиза, додека за останатите е направен протокол за згрижување во нашиот здравствен систем. Ова ќе трае подолго и сакаме да креираме пристап кој постојано ќе ги следи, нагласи министерот Алиу.
Директорката на Општата болница во Кочани, Катерина Паниќ Мирчовска, објасни дека денешниот спортски настан во кошарка не е само дружење, туку дел од процесот на заздравување.
-Спортот е еден вид физикална терапија за изгорениците на рацете која тие неосетно ја прават низ игра, а воедно има и голема психолошка придобивка. На секои шест до седум месеци ќе правиме реевалуација на нивната состојба. Во блиска иднина кај дел од нив ќе започнат и сложени хируршки интервенции, особено на прстите на рацете и на лицето, каде мораме да бидеме многу претпазливи за да не се формираат нови лузни, истакна Паниќ Мирчовска.
Настанот во Кочани заврши со порака дека, иако трагедијата остави длабоки траги, заедништвото и континуираната грижа се клучни за целосно закрепнување на повредените млади луѓе
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
