Со земјоделска механизација и автомобили жителите на Тркање попладнево ја блокираа улицата „Мите Стојчев“ што поминува низ селото, а по која поминуваат голем број тешки товарни возила, автобуси и други превозни средства кон индустриската зона во Кочани.
Учесниците на протестот истакнаа дека поради интензивниот сообраќај се загрижени за личната и безбедноста на најмладите во семејствата, а коловозот е сериозно оштетен и не можат да го користат за своите секојдневни потреби.
-Оваа улица не е предвидена за толкав број возила, а посебно што секојдневно поминуваат автобуси за вработените, миксери за бетон, тешки камиони со повеќе од 40 тони. Асфалтот целосно е пропаднат, а ѕидовите на куќите во близина веќе се напукнати. Бараме од Општината, од државата или од странски донации да помогнат и да се направи генерална реконструкција. Исто така, да се постават сообраќајни знаци за предвидената носивост и успорувачи на брзината на возилата, а тоа да биде што побрзо, истакна Љупчо Стоименов, жител на Тркање.
Претставници од општинскиот Сектор за урбанизам, од сообраќајната инспекција и в.д. градоначалникот на Кочани, Венко Крстевски се сретнаа со жителите на Тркање и ги информираа дека во тек е постапка за реконструкција на улицата, а ќе се гради и ново сообраќајно решение од друг правец, што ќе се користи за потребите на индустриската зона и за компанијата „Амфенол Технолоџи Македонија“.
-Ова село е запоставувано со години и го поддржувам правото на протест на жителите. За неполн месец, колку што сум на функцијата, имавме состанок со претставници од селото и беа донесени заклучоци, во најбрз можен рок квалитетно да се реконструира оваа улица и да се обезбеди нов пристап за возилата за компаниите. Се работи за сериозна инвестиција, за тоа е потребно и време, а во план се и други проекти за ова село кое е во нашите приоритети, истакна в.д. градоначалникот Крстевски.
Од компанијата „Амфенол Технолоџи Македонија“, која ја користи улицата за пристап и превоз на вработените, истакнаа дека имаат разбирање за барањата на жителите на Тркање и им даваат поддршка за решавање на проблемот.
-Ние сме на иста страна со нив и надлежните институции треба да си ја завршат работата што веќе три-четири години тапка во место. При изградбата на експресниот пат Кочани – Штип ние реагиравме, но нашето барање не беше прифатено и пропуштена е можноста да се изгради надвозник. Има проект што предвидува како да се реши, но засега стои само на хартија. Ова е аларм да се забрзаат работите, што можат за неколку месеци да се решат, за да превенираме ризици од тешки сообраќајни несреќи, да се скрати патувањето на нашите вработени, а и на жителите на ова село ќе им се олесни живеењето, истакна Сашко Наков, директор на „Амфенол Технолоџи Македонија“.
Стручните служби во Општина Кочани информираа дека веќе е почната постапка за експропријација и изградба на нов сообраќаен пристап, со што ќе се избегне влегувањето на тешки возила во селото. Реконструкцијата на улицата „Мите Стојчев“ треба да се заврши во рок од неколку месеци, а според предвидувањата новата сообраќајница за индустриската зона би требало да биде ставена во функција во почетокот на идната година.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
