Противпожарно возило од марката „ивеко“ и опрема за лична заштита и спасување доби Доброволното противпожарно друштво од Кочани што ги донираше Амбасадата на Германија.
Донацијата е во рамки на воспоставената соработка и е поддршка за општина Кочани по трагичниот пожар во клубот „Пулс“. Возилото кое набавено со средства од Амбасадата, располага хидраулична опрема, пумпи за вода, клешти за извлекување лица во сообраќајки, а може да превезува и девет лица. Во комплетот заштитна опрема има три илјади заштитни панталони, шлемови, ракавици и други единечни делови, како и 300 пара чизми, а опремата ја обезбедија членовите на германското Здружение на доброволни пожарникари.
-Со колегите зедовме одмор за да возиме три илјади километри и да ја донесеме опремата и запознавме луѓе на кои таа навистина ќе им биде потребна. Посакуваме да немаат многу интервенции, а од оние малку што ќе ги имаат да се вратат живи и здрави и да бидат соодветно заштитени, истакнаа претставниците на германското Здружение на доброволни пожарникари.
Благодарност за донацијата искажаа од ДПД – Кочани од името на сите граѓани на општината.
-Со оваа опрема значително ги зголемуваме нашите капацитети за дејствување, како кај пожари, така и кај технички интервенции и во сообраќајни несреќи. Ова е голем исчекор за нашата работа и се надеваме дека во иднина ќе можеме заедно да соработуваме на други проекти, истакна Златко Илијев, претседател на ДПД – Кочани.
При престојот во Кочани, претставниците на германското Здружение на доброволни пожарникари пред клубот „Пулс“ им одадоа едноминутна почит на настраданите во катастрофалниот пожар.
Донацијата на возилото и опремата е продолжување на поддршката од Амбасадата на Германија која заедно со ДПД – Кочани пред две недели почна проект за психолошки обуки за наставниот и друг кадар во основните и средните училишта, како и за воспитувачите во градинките во Кочани. Исто така, ќе се спроведат практични обуки за укажување прва помош, превенција и заштита од пожари за учениците.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
