Со вкупен раст на производството од 10 отсто ќе биде одбележана тековната 2024 во споредба со минатата година во компанијата „Амфенол Технолоџи Македонија“, што претставува предизвик за остварување нови успеси и во претстојниот едногодишен период.
На денешната прес-конференција директорот на компанијата, Сашко Наков изрази задоволство и гордост од постигнатото, особено што се реализирани повеќе нови проекти и процеси, а почна со работа и нова бизнис единица.
– „Амфенол Технолоџи Македонија“ може да се пофали со одлични резултати во годината што изминува, растот е некаде околу 10 проценти што во овие услови и предизвикувачка година е одлично. Благодарност до сите вработени, до тимот за сѐ што е направено во 2024 година. Стигнавме до бројка од околу 3.200 вработени, извозот е зголемен за десетина проценти и повторно сме во групата на првите 5 компании извозници од Македонија. Сите тие параметри даваат за право да бидеме горди што сме дел од „Амфенол“, истакна Наков.
Обраќајќи се до јавноста, Наков нагласи дека и во 2025 година се очекува да продолжи растот, а од почетокот на новата година ќе стартува со работа уште една производна единица.
-Почнавме со подготовки за нова хала во автомобилскиот дел, и таму планираме една нова димензија, процеси кои ќе бидат нови за нас и бараат сѐ повеќе автоматизација и знаење на вработените. Тоа е предизвик за сите и можност за унапредување и усовршување. Втората работа е што почнуваме со новата , десетта деловна единица – профитен центар во „Амфенол Технолоџи Македонија“. Подготовките се во тек и стартуваме од јануари. Имаме веќе готова зграда која ја адаптираме и тоа би биле поглавните активности кои ги очекуваме во 2025 година. Го зголемуваме нашето портфолио на подготовка на уреди за тестери за надградба на опремата за алати и алатница и имаме се повеќе компетентост и експертиза кај нас. Ние секогаш сме амбициозни и се надеваме на околу 200 милиони евра извоз во следната година, информираше Наков.
Како и во тековната и во наредната година ќе продолжи трендот на пораст на платите заради подобра мотивација и задржување на вработените.
-Најважно е дека минималната плата доведува до корекции на сите плати. Во сите предизвици и кризи, вработените на „Амфенол“ секогаш биле заштитени. За квалтиетните и лојални вработени секогаш имаме изнајдено начин како да ги заджиме и наградиме. Наша цел е вработените да ја чуствуваат компанијата како своја компанија која ќе им врати соодветно на тоа, заклучи Наков.
За сите вработени во „Амфенол Технолоџи Македонија“ и во 2025 година ќе продолжи грижата за здравјето, односно ќе се плаќа приватно здравствено осигурување.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
