Амбасадорот на Република Полска, Кшиштоф Гжелчик денеска оствари работна посета на општина Виница, при што донираше книги од полски автори на општинската библиотека „Ванчо Прке“.
Донацијата е во рамки на проектот „Полска на полица“ што почна годинава и опфатени се националните и општински библиотеки во десетина градови, а чија цел е популаризација на полската литература меѓу македонските читатели. Амбасадата обезбеди педесетина наслови од класичната и современата полска литература, а подготви и каталог со опис на делата и презентација на нивните автори.
Координаторка на проектот за донација на книги е госпоѓата Јоланта Гжелчик, сопруга на полскиот амбасадор, која исто така е тесно поврзана со библиотекарската дејност во родната земја.
-Драго ми е што библиотекарите се вклучија во оваа иницијатива, затоа што преку книгите и читателите ќе воспоставиме посилни врски и ќе ја промовираме нашата книжевност. Се надеваме дека вашата читателска публика ќе најде интересни наслови и ќе ја мотивираме и понатаму да истражува и да ја открива полската литература. Во рамки на проектот организираме конкурси за млади и возрасни читатели. Очекуваме дека овие активности ќе резултираат не само со понатамошни проекти што ги реализира Амбасадата, туку и со потесна соработка на македонските и полските библиотекари и со задоволство ќе помогнеме во воспоставувањето контакти, истакна госпоѓата Гжелчик.
Библиотеката „Ванчо Прке“ е прва меѓу општинските библиотеки која се приклучува кон одбележувањето на Месецот на полската книжевност и проектот „Полска на полица“. Директорката Лилјана Капевска истакна дека тие веќе имаат одреден број книги од полски автори, а со донацијата на новите наслови ќе се отвори посебно катче за полска литература. Притоа упати благодарност за подарените книги и можноста младите, но и повозрасните читатели подобро да се запознаат со книжевноста на пријателска Полска.
Во рамки на посетата на Виница, полскиот амбасадор се сретна и со градоначалникот Миле Петков, при што беше договорено соработката да продолжи, пред сè на културно-образовен план, преку посета на музички фестивали и размена на ученици и искуства од двете држави во рамки на европските проекти за образовна поддршка.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
