Членовите на Доброволното противпожарно друштво – Кочани не го прифаќаат предлогот од Општина Кочани да учествуваат во 24-часовно физичко обезбедување на депонијата кај селото Бели.
Пожарникарите волонтери оцениле дека тоа не спаѓа во делокругот на нивните обврски и не можат да одговорат на евентуално преземената задача.
-По состанокот што утрово го одржавме со градоначлникот и секретарот на Општина Кочани, јас ги запознав нашите членови со предлогот да се вклучиме во обезбедувањето на депонијата. Мнозинството волонтери сметаат тоа не е нивна обврска, не сакаат да им биде загрозена личната безбедност, а и средствата што планирала да ги издвои Локалната самоуправа не се соодветни на трошоците што би произлегле од преземањето на обврската, истакна Златко Илијев, претседател на ДПД – Кочани.
Во писменото известување што го испратија пожарникарите волонтери меѓу другото е наведено дека со апсолутно мнозинство е констатирано дека ДПД Кочани во моментов како со човечки, така и со технички капацитети не може позитивно да одговори на понудата од Општина Кочани.
-Како и до сега, така и натаму остануваме отворени за меѓусебна соработка во склоп на нашите капацитети и можности со Општина Кочани и КЈП Водовод на кои низа наврати имаме излезено во пресрет, како за Депонијата, така и за јавната чистото и зеленило. Оваа прилика ја користиме да упатиме уште една порака до сите засегнати, што поскоро да се изнајде решение за подобро утро на сите нас, се вели во известувањето од ДПД – Кочани.
На разговорот што преставниците на Доброволното противпожарно друштво го имале со општинското раководство било предложено пожарниаритре волонтери да се вклучат во обезбедувањето на Градската депонија, со тоа што ќе ја преземат третата смена од чуварската служба.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
