Во општинската библиотека „Искра“ денеска беше промовирана монографијата „60 години Литературен клуб „Копнеж“ – Кочани“ од авторките Кристина Ѓорѓиевска Атанасова, Аника Илијевска Ѓорѓиева и Славица Цветкова.
На промоцијата беше истакнато дека се работи за значајно литературно дело со кое се одбележува еден важен сегмент од културното живеење во градот и општината.
– Ни беше чест изработката на монографијата бидејќи оддаваме почит не само на сегашните членови во литературниот клуб „Копнеж“, туку и на сите поранешни членови. Оддаваме респект и кон веќе починатите членови коишто не се меѓу нас, како и на раководители и претседатели на клубот. Поместени се историски факти од основањето на клубот, првите почетоци и ентузијазмот,, споменати се голем број членови, како и сите раководители на литературниот клуб. Како круна, некако случајно се јави, во годината на одбележувањето на 60-годишнината ја добивме наградата за значајно остварување во Општина Кочани. Како библиотека пак, се заблагодаруваме на сите чинители коишто го создадоа Клубот „Копнеж“, како и на сите соработници, односно Општина Кочани, основните и средните училишта, и други институции од областа на културата и други дејности, истакна Кристина Ѓорѓиевска Атанасова коавторка на монографијата.
Во шестедецениското постоење на литературниот клуб, кој работи во состав на билбиотеката „Искра“, издадени се голем број стихозбирки и прозни дела на неговите членови, што ја потврдува важноста што тој ја имал во промовирањето на роднокрајните автори.
-Досега низ клубот поминале повеќе од илјада членови, кои создале многу песни и литературни творби. Ние сме горди што ги наследуваме нив, меѓутоа ќе бидеме уште повеќе горди ако дојдат помлади луѓе и нас да нѐ наследат, рече Раче Мицов, актуелен претседател на ЛК „Копнеж“.
На промоцијата беше речено дека во моментот членови на клубот има од сите возрасти, при што најстариот е на 88-годишна возраст, а најмладиот има 12 години. Првиот претседател на клубот, Димитар Гогов бил член и на Друштвото на писателите на Македонија.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
