В петок, на 9 октомври, со почеток во 20 часот во Младинскиот културен центар во Скопје, во рамки на фестивалот „Здраво млади“, ќе се одржи националното финале на „Imagine Macedonia 2026“ во организација на Музичка младина на Македонија.
На сцената ќе настапат пет млади бендови од домашната алтернативна сцена, а меѓу нив посебно внимание привлекува младата рок група „Немеза“ како нов претставник од Кочани.
Кочанските музичари влегуваат со големи очекувања на овој натпревар, во обид да го повторат минатогодишниот успех на бендот „Корка“, кој го освои националниот избор и ја претставуваше Македонија на меѓународната сцена во Брисел.
„Немеза“ е нов бенд формиран во 2025 година, чии членови се на возраст од само 15 и 16 години. Составот го сочинуваат Антониа Андонова, Ирина Китаноски, Милана Пантова и Ангел Лазаров.
И покрај нивната младост, тие веќе градат препознатлив и оригинален звук преку спој на прото-панк и алтернативен рок, збогатен со силни гараж-рок елементи. Во август годинава, како најмлад бенд во програмата, тие оставија силен впечаток со својата енергија и живописен настап пред публиката на „Расплет фестивал“ во Кочани.
На сцената во МКЦ, покрај кочанската „Немеза“, за победничката титула ќе се борат и млади алтернативни состави со различни музички изрази: The Last Thing You Said, Нема назад, Персеида и Yамка. Во ревијалниот дел од вечерта ќе настапи скопскиот алтернативен рок бенд СРЖ.
На крајот од вечерта, стручното жири ќе го избере победникот на „Imagine Macedonia 2026“, кој ќе ја претставува Македонија на меѓународното финале на „Imagine“ во Брисел, со финансиска поддршка од Министерството за култура и туризам.
Кочанската музичка сцена има за што да се гордее, со оглед на тоа што минатогодишното национално издание го освои токму кочанскиот бенд „Корка“. На меѓународното финале во Брисел, „Корка“ успеа да ја освои и престижната награда од публиката – People’s Choice Award.
Програмата „Imagine Music Experience“, наменета за млади музичари на возраст од 13 до 21 година под закрила на „Jeunesses Musicales International“ (JMI), претставува значајна платформа за млади автори да ја претстават својата музика, да стекнат сценско искуство и да се поврзат со свои врсници од целиот свет.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
