Музејот „Теракота“ од Виница е домаќин и организатор на изложбата на пафти, токи и колани од етнолошката збирка на Националната установа Завод и музеј од Штип, што денеска беше отворена во изложбениот салон на Домот на културата „Тошо Арсов“.
Настанот е дел од програмата за одбележување на 81-годишнината од ослободувањето на Виница, а приредувач на изложбата е вишиот кустос Бети Иванова од штипскиот музеј.
На отворањето беше нагласено дека пред виничката публика е изложен само дел од збирката на пафти, токи и колани што ги поседува музејот, при што тие не се само украс на женската традиционална носија, туку се и симобили и сведоци на идентитетот и убавината вткаени во македонскиот етнос.
-Тие нѐ потсетуваат кои сме и од каде доаѓаме, нѐ повикуваат да го чуваме и да го пренесуваме наследството што ни било оставено со љубов и мака, со визија и достоинство. Оваа изложба нека биде потсетник и инспирација да продолжиме да го негуваме она коешто нѐ дефинира, затоа што минатото не е само прашина, тоа е патоказ, истакна Сара Даневска, директорка на Музејот „Теракота“.
Обраќање пред присутните имаше и авторката на изложбата Иванова која нагласи дека збирката брои околу 300 парчиња накит од метал и монистра. Тоа се прекрасни и вредни занаетчиски изработки кои се највпечатлив накит на женската народна носија и градската женска облека што се носела од 19 век, па сѐ до средината на 20 век.
-Се забележува богата орнаментика од растителни стилизирани мотиви на цвеќиња, гранчиња и лозички, вткаени се и геометриски мотиви од кои најзастапени се кругот, ромбот, цик-цак линијата и други. Кај некои од нив, иако ретко, се забележуваат и мотиви на животни и луѓе.Орнаментиката изобилува со различна симболика и значење преку што се препознаваат верските определби и народните верувања, а покрај тоа се препознава и социјалниот и екопномскиот статус на оној кој што го носел. Носењето и украсувањето со накит, и неговата различност, го истакнува соединувањето, поврзувањето и преминот од еден во друг животен циклус на жената, симоболизирајќи ја главно плодноста и заштитата, истакна Иванова.
Во рамки на изложбата настапија и млади музичари под водство на Димитар Харалампиев, кои на традиционални инструменти исполнија неколку обработки на македонски фолклорни мотиви.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
