Здружението „Еко Тим Исток“ – Кочани и Здружението за единствени приказни „Детелина“ – Виница во наредните осум месеци ќе го реализираат проектот „И децата за почиста животна средина“ што ќе опфати ученици во основното образование во двете општини.
Проектот е насочен кон зајакнување на локалните организации, како и кон стимулирање и зголемување на придонесот во заедницата и јакнење на врската со конституентите и граѓаните за заштита на животната средина.
Целна група во проектот ќе бидат ученици од прво до деветто одделение од основните училишта „Св. Кирил и Методиј“ и „Никола Карев“ од Кочани, и „Гоце Делчев“ и „Славчо Стојменски“ од Виница.
-Младите се нашата иднина, двигатели на промените во општеството и за таа цел проектот ќе опфати мерки и активности кои ќе бидат едукативни, интерактивни и забавни за да најпрвин го поттикнат нивниот интерес. Ваквите мерки можат да помогнат децата да станат свесни и активни учесници во заштитата на животната средина, со што ќе се создаде нова генерација одговорни граѓани. Од друга страна пак, децата се тие кои што своите навики и стекнати знаења многу често и многу лесно ги пренесуваат на нивните семејства и опкружувања, со што индиректни учесници во проектот (секундарна целна група) ќе ни бидат и возрасните граѓани од двете општини кои имаат контакти со инволвираните деца во проектот, истакна Ирена Мирчовска, координаторка на проектот и претседателка на Здружението „Еко Тим Исток“.
Резултатите што се очекуваат од реализацијата на проектот се поттикнување на тимската работа и иницијативи што ќе се занимаваат со локални еколошки прашања, потоа зголемување на свеста кај децата за еколошките проблеми, како и зголемена видливост за еколошките проблеми и можните решенија кај пошироката јавност.
-Бидејќи мисијата на Здружението „Детелина“ е поттикнување и создавање на единствени приказни за животот на децата со предизвици во развојот преку нивно социјално вклучување во општеството, најмалку 5% од учениците – целната група во реализацијата на проектните активности ќе бидат деца од ранливи категории или со пречки во развојот со цел поттикнување на нивните таленти, вештини и знаења, како и подигнување на свеста за важноста од нивна инклузија, истакна Симона Захариева, проектна асистентка и претседателка на Здружението „Детелина“ – Виница.
Проектот „И децата за почиста животна средина“ се реализира како субгрант добиен во рамки на „ЕУ поддршка за Граѓански ресурсен центар – фаза 2” финансиран од Европската Унија.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
