Општина Кочани, во соработка со локални институции и граѓански здруженија, денеска го одбележа 3 Декември – Денот на лицата со попреченост.
По тој повод во библиотеката „Искра“ беа доделени подароци на децата со попреченост, членови на Спортската асоцијација „Бочија – клуб Зоја“ од Кочани.
-Секоја година го одбележуваме Денот на лицата со попреченост и следиме како работат поединци и здруженијата на граѓани со овие лица, затоа што и ним како Општина им должиме поддршка. Годинава поддршка даваме и за Здружението „Зоја“ затоа што тоа неколку години континуирано работи со лицата со попреченост за рекреативно-спортски активности, за што се ангажирани и наставници од ОУ „Никола Карев“, истакна Аника Горгиева Илијевска, виш соработник за социјална и здравствена заштита во Локалната самоуправа на Кочани.
Од Здружението „Зоја“ изразија благодарност за поддршката во нивното работење и за вниманието што им се дава на лицата со попреченост.
-Здружението работи веќе трета година по ред, почнавме волонтерски во салата на ОУ „Никола Карев“, благодарни сме на училиштето што ни даде термин и од ден на ден имаме сѐ повеќе спортски активности. Имаме во план и некои други активности, за што добиваме и поддршка и од Општината, од Библиотеката „Искра“, еве и од Ротари клубот самоиницијативно се јавија за соработка. Се надеваме дека и во иднина ќе оствариме нови соработки за да ги инклузираме овие деца во секојдневието, тие да се чувствуваат пријатно и во секоја прилика да им го олесниме животот за да се почувствуваат корисни во општеството, истакна Радмила Божиновска, претседателка на Здружението „Бочија, клуб Зоја“.
Во рамки на настанот ученици од ОУ „Никола Карев“ – Кочани, под менторство на наставничката Анкица Манасиевска, прикажаа драматизација од книгата за деца „Непослушната Свиленка“ од авторката Ана Дедова. Исто така, на СОУ „Гошо Викентиев“ му беше доделен вредносниот ваучер со собраните средства од минатогодишната хуманитарна акција за набавка на помагало со кое учениците со посебни потреби полесно ќе се движат по скалите во ова училиште.
Градоначалникот Папазов и претставници од Локалната самоуправа го посетија и Дневниот центар за лица со попреченост во Кочани и остварија средба со децата со интелектуална попреченост згрижени во овој центар.
Како дел од одбележувањето на 3 Декември е и посетата на специјалната паралелка во ОУ „Малина Попиванова“ каде за учениците со попреченост се обезбедени материјали за работа и подароци.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
