Со рачно зажнејување на ориз со срп и вршење на гумно во населбата Оризари официјално почна овогодишната жетва на оризот, во рамки на 33. издание на манифестацијата „Денови на кочанскиот ориз 2024“. Првиот сноп го ожнеаа жетварската убавица и нејзините две придружнички, поддржани од членовите Здружението на пензионери од Кочани.
Годинава признанието „Најуспешен земјоделец“ им припадна на жителите на Оризари, Сашко Трајчев и Сашко Стојанов, при што градоначалникот Љупчо Папзаов им ги додели паричните ваучери.
-Оваа награда е една мотивација за младите и понатаму да продолжиме да се занимаваме со оризопроизводството. Приносите се добри, но ќе видеме каква ќе биде цената, рече Сашко Стојанов.
-Наградата ќе ми биде дополнителен стимул за понатаму повеќе да работам со оризопроизводството. Во Оризари приносот е добар и се движи од 700 до 800 килограми по декар, додаде Сашко Трајчев.
На настанот во Оризари присуствуваа повеќе делегации од државата и странство, а министерот за земјоделство, шумарство и водостопанство, Цветан Трипуновски на оризопроизводителите им посака успешна жетва, богат род и квалитетен ориз.
-Ние како Министерство ја поддржуваме и оваа манифестација со цел да ја продолжиме традицијата и да го афирмираме постоењето на оваа житна култура за нас како држава. Се надевам дека ќе имаме добра жетва и квалитетен ориз од реколтата 2024. Од разговорите со земјоделците и првичните информации говорат дека ќе имаме зголемен род и богата жетва, а согласно тоа и квалитетот ќе биде добар, истакна Трипуновски.
Големиот број на гости имаа можност да уживаат во изложените традиционални ракотворби и традиционална храна подготвена од вредните домаќинките од Оризари.
Во рамки на културно-забавниот дел настапија орекестарот на народни инструменти при музичкото училиште „Ристо Јуруков“, Фолклорниот ансамбл „Љупчо Сантов”, оркестарот „Мелем“, а концерт одржа и фолк пејачот Дамјан Стојаноски.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
