Компанијата „РЕДИ Рециклажа“ од Скопје ја вклучи и општина Кочани во кампањата за бесплатно собирање стари електронски апарати и отпад.
Акцијата е закажана за в петок, 22 ноември, со што жителите ќе можат без да плаќаат никаков надоместок да се ослободат од старата бела техника и други електронски уреди. Во акцијата ќе се собира стара ИТ– опрема, бела техника, телевизори, монитори, мобилни телефони и друг електронски отпад.
-Сè што треба да направите е во текот на оваа работна недела, до петок, да се јавите на телефонскиот број 076-460-655, да ја оставите вашата адреса и да закажете бесплатно подигање на отпадот и на уредите од адресата што ќе ја наведете. Придружете се на оваа акција за почиста животна средина, повикуваат од „РЕДИ Рециклажа“.
Според официјалните податоци од Светскиот институт за ресурси, емисиите на CO2 по глава на жител во Македонија во 2019 година изнесувале 4,28 тони, наспроти глобалниот просек од 4,79 тони по лице. Експертите и набљудувачите истакнуваат дека земјата треба брзо да развие стратегија за управување со отпад, со оглед што домаќинствата сè уште собираат секаков вид отпад во една канта или го празнат во улични контејнери. Потоа ѓубрето со камиони на општинските комунални претпријатија се носи на депонија, каде што се складира на земја. Ова управување со отпад во државата е со екстремно ниско ниво на селекција и рециклирање.
Статистиката ја потврдува лошата состојба: во 2017 година Македонија создала 787 илјади тони отпад, од кои само 0,6% биле рециклирани. Во 2019 година, отпадот достигнал 916 илајди тони, а капацитетот за рециклирање паднал на само 0,3%.
Надлежните од Министерството за животна средина и просторно планирање тврдат дека сегашната законска рамка е соодветна и усогласена со стандардите на Европската Унија, но законите, стратегиите и плановите за управување со отпад и заштита на животната средина се слабо имплементирани на ниво на општина. Општините прво треба да почнат да работат на селекција на отпадот. Во моментот скоро и да нема селектирање на отпадот во повеќе од една канта, а стандардите наложуваат домаќинставата да имаат една (жолта) канта за пластична амбалажа, стакло, хартија и слично, една за мешан отпад што не може да се рециклира и една за органски отпад.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
