Општина Кочани денеска ја одржа најавената јавна презентација по Деталниот урбанистички план за градска четврт 13 (Текешински Лозја и околината) од ГУП за град Кочани за планскиот период 2022–2027 година.
На презентацијата присуствуваа голем број заинтересирани граѓани, а планот беше претставен од проектантското биро ДТУ БИЛД УРБАН ДООЕЛ Скопје. Притоа беше нагласено дека се работи за законска постапка за донесување на планскиот документ со кој е опфатена површина од 69,12 хектари.
Граѓаните изразија незадоволство и се спротивставија на предвидената изградба на објекти за колективно домување, односно станбени згради на локацијата на сегашниот панаѓур. Притоа, во дискусиите беше нагласено дека целата градска четврт 13 е доволно урбанизирана, особено со колективно домување, поради што има проблеми со водоснабдувањето, одведувањето на отпадните води, собирањето на комуналниот отпад и паркирањето. Беше споменато и нарушувањето на протокот на воздух поради веќе изградените објекти, поради што се чувствува загаденост. Поради тоа, граѓаните беа едногласни во ставот дека просторот кај Панаѓурот треба да биде уреден како парк.
Советници од претходниот состав на Советот на Општина Кочани посочија дека планот не бил прифатен во минатиот мандат и прашаа зошто повторно се става на разгледување. И дел од сегашните советници најавија дека нема да дадат поддршка за предложениот Детален урбанистички план.
Јавната анкета, со можност за поднесување писмени забелешки за Деталниот урбанистички план за градска четврт 13 трае до 4 март.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
