Доброволното противпожарно друштво – Кочани го прошири возниот парк со уште едно возило, специјализирано за гасење шумски пожари.
Се работи за камион од Белгија, што го донираше општествено одговорната компанија ,,Антура” од Кочани, а вредноста на возилото е 25 илјади евра.
-По поминати повеќе од 5.000 километри, низ шест држави и шест денови патување, еве нè дома со ново противпожарно возило. Најпрвин сакам да се заблагодарам на колегите кои беа со мене и на колегите кои ни приредија прекрасен дочек. Сето ова немаше да биде реалност без компанијата ,,Антура” и менаџерскиот тим. Морам да кажам дека за една недела по првичниот состанок, успеаа да го организираат целиот транспорт и да ги подмират трошоците. Сакам да се заблагодарам и на Локалната самоуправа – Кочани бидејќи ни отстапи едно од службените возила со кое заминавме на пат за Белгија. Во однос на возилото, станува збор за специјализирано возило за гасење шумски пожари, теренец со погон на сите четири тркала, со носивост на вода од 4 тони и екипаж од четири пожарникари, истакна Златко Илијев, претседател на ДПД – Кочани.
Од компанијата ,,Анатура” истакнаа дека возилото, марка Ман, е донација по повод успешниот 10-годишен јубилеј од постоењето.
-Среќни сме што овој настан се поклопува со одбележувањето на десетгодишнината на нашата компанија. Се надеваме дека дадовме голем придонес на ДПД – Кочани, за да можат полесно да се справуваат со елементарните непогоди на кои што и самите сме сведоци овој период. Им посакуваме да имааат што помалку работа, рече Христина Јорданова од ,,Антура”.
Во моментот ДПД од Кочани располага со пет возила.
-Комбе, навален камион, камион цистерна, АТВ четирициклот и сега возилото специјализирано за шумски пожари. Друштвото моментално работи на повеќе планови, односно се работи на доопремување на АТВ возилото со резервоар и пумпа за вода, а и на новото возило ќе треба да преправиме некои работи, бидејќи е направено за белгиски стандарди, додаде Илијев.
По повод пристигнувањето на петтото возило, вечерва беше организирана пригодна свеченост во кругот на ТППЕ – Кочани.
Од ДПД – Кочани најавија дека на 14. септември ќе го прослават третиот роденден, при што ќе организираат меѓународен натпревар со противпожарни игри.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
