Иницијативите за изградба на инфраструктура со која ќе се растовари и во голем дел може да се реши сообраќајниот метеж во Кочани не се нови. Веќе една деценија граѓаните слушаат ветувања, но најважните од нив сѐ уште не се реализирани.
Запишани во предизборните програми и најавувани на почетокот од секој мандат на градоначалниците, проектите беа споменувани како приоритетни, но состојбата на терен останува иста.
Воведувањето надомест за паркирање, изградбата на кружни текови што потоа беа претворени во „полукружни“, како што во шега ги нарекуваа граѓаните, менувањето на насоките на движење на возилата од север кон југ и обратно, не ја променија значително сликата за хаосот што и понатаму останува актуелен. А најавите на досегашните први луѓе на Општината изгледаа ветувачки.
-Изградба на катна гаража во централното градско подрачје кај поштенската зграда. Ќе се изгради катна гаража во која би се паркирале одреден број на возила. Од тоа би се намалил сообраќајниот метеж во сообраќајот во централното градско подрачје, најави градоначалникот Ратко Димитровски.
-Ќе понудиме нов начин на регулирање на сообраќајот во Кочани. Преку изградба на сообраќајни мостови кај џамијата, Монополски Бавчи и во населбата Оризари. Исто така, во нашата програма имаме предвидено изградба на катна гаража, со цел да се регулира паркирањето по градот, вети и градоначалникот Николчо Илијев.
-Доаѓа новата иднина со новите мостови и кеј на Кочанска Река. И новиот прекрасен парк Локубија. Новиот јужен влез на градот и новата катна гаража во центарот, промовираше во предизборието градоначалникот Љупчо Папазов.
-Со гордост можам да кажам дека од 1 јануари интензивно стартуваме со изградба на ветениот јужен булевар, потисниот цевковод и мостот на Кочанска Река помеѓу улиците „Вера Которка“ и „Лазар Андонов“. Општина Кочани подготвува урбанистичка документација за изградба на катна гаража, како и за поставување на урбана опрема – платформи за паркирање, рече градоначалникот Владко Грозданов во неодамнешното предновогодишно обраќање на седница на општинскиот Совет.
Десет години можеби и не се многу за решавање на виталните урбанистички и сообраќајни проблеми во едно населенo место. Особено ако се гради мост или комплетно нов булевар.
Сепак, оние кои се родиле во периодот кога проектите првпат беа најавени, денес се ученици во основно образование, оние кои биле средношколци веројатно се на факултет во други градови во земјата или странство, а голем дел од возрасните граѓани кои тогаш биле учесници во сообраќајот, можеби сега живеат во други држави. Оние кои останаа овде и понатаму ги имаат истите проблеми.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
