Десетина најдобри и талентирани млади информатичари од Македонија се дел од еднонеделниот подготвителен камп за националните информатички тимови, што трета година по ред се одржува во Кочани.
Учениците се сместени во угостителскиот објект „Изгрев“ на Пониква, каде имаат одлични услови за подготовка за идните настапи на меѓународна сцена. Поддршка за нивниот престој дава и Општина Кочани, а при посетата на в.д. градоначалникот Венко Крстевски беа разменети мислења за натамошно унапредување на соработката, при што му беше доделена и благодарница.
Кампот го водат врвни професори и ментори од Факултетот за информатички науки и компјутерско инженерство – ФИНКИ од Скопје, на чело со претседателот на Здружението на информатичари на Македонија (ЗИМ) проф. д-р Миле Јованов.
– Годинава Светската олимпијада по информатика веќе се одржа во Боливија и таму постигнавме огромни резултати, два сребрени медала, што е најдобар резултат досега за Македонија. Ни претстојат Балканската олимпијада, која што ќе се одржи во Италија, Европската јуниорска олимпијада во Шумен во Бугарија и Балканската јуниорска олимпијада во Кипар. Имаме десетина ученици, тука тие се најдобрите, и се трудиме да ги научиме да бидат што е можно подобри затоа што ќе се натпреваруваат со ученици од сите други земји коишто учествуваат на натпреварите. Ние како мала земја, ученици одбрани од еден ипол милион жители, мораме да бидеме многу добри за да можеме да имаме добри резултати. Очекувањата ни се секогаш високи, добро е кога имаме континуитет, секоја година да имаме повеќе ученици и секој од нив да има повисок квалитет, а дел од тоа доста помага и ова континуирано работење со нив, вакви подготовки, делумно во Скопје во текот на учебната година онлајн и сега овие, како што ги нарекуваме вистински подготовки на планина кога сме сите тука еден до друг 24 часа и со можност нели што е можно повеќе знаење да им пренесеме, истакна претседателот на ЗИМ, Миле Јованов.
Домаќин и организатор на едукатиувниот подготвителен камп на Пониква е Здружението „Бистри умови“ од Кочани, кое веќе две години по ред организира и неколкумесечни бесплатни курсеви по математика и информатика за ученици од цела Македонија.
-Среќни сме што по трет пат, еве благодарение на градоначалникот, можеме да си го дозволиме да ги примиме најдобрите информатичари, да бидат во нашиот град, на Пониква да се подготвуваат за претстојните меѓународни олимпијади. Идејата ни беше здружението го формираме само за да им помагаме на талентираните деца од Македонија. Имаме бесплатни курсеви по математика, информатика, односно подготовки за натпревари и математика информатика и со гордост можам да кажам дека претходната година на тие неколку месечен и бесплатни курсеви присуствуваа околу 1700 деца од цела Македонија, истакна Анита Атанасова-Грчев, претседателка на Здружението „Бистри умови“ од Кочани.
Заедно со професорите од ФИНКИ, со учениците на кампот работат и тренери, односно студенти кои претходно учествувале на меѓународни натпреварувања.
-Јас сум Иван, поранешен натпреварувач во тимот на Македонија, сум учествувал на Светска олимпијада, на Европска јуниорска олимпијада и сега сум тука како еден вид на тренер. Доаѓам од Валандово, студент на Факултетот за информатички науки и компјутерско инженерство, тука организираме за децата натпревари, секој ден имаат по еден натпревар кој се состои од три задачи. Целта е на некој начин да го имитираме натпреварот што ќе биде на самата Олимпијада, значи тој трае 5 часа, три задачи како што кажав и тие се обидуваат што е можно повеќе поени да извадат и потоа ги поминуваме задачите.
Во слободните активности како дел од кампот на Пониква, младите информатичари од Македонија го поедукативниот центар на компанијата „Мак Прогрес – Винчини“, каде ги очекуваше поинакво и незаборавно доживување, при што сами приготвуваа свои тортини.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
