Жителите на Блатец веќе седум години ја водат правната битка против изградбата на малата хидроцентрала на реката Блатешница, која им е главен извор за снабдување со вода за пиење. Сметаат дека при донесувањето на одлуката за издавање на концесијата во 2015 година и давањето одобренија за градење на објектот, владините институции го занемариле фактот дека не се испочитувани сите законски одредби за тоа.
Во 2017 година Месната заедница организираше голем протест и блокада на патот во близина на православната црква “Св. Илија“ во Блатец. Пред две години од Општина Виница информираа дека ќе иницира одземање на одобрението за градба, затоа што истекол рокот во кој требало да почнат градежните активности.
Повторното актуелизирање на проблемот е поради тоа што Владата, на неодамнешната 7. седница, му го продолжила рокот за комерцијална работа на инвеститорот на локацијата за хидроцентралата до крајот на оваа календарска година. Поради тоа, членовите на Здружението за подобрување на квалитетот на животот во Блатец поднесоа барање за поддршка од Советот на Општината, потсетувајќи на главните аргументи против изградбата.
-При доделувањето на концесиијата за оваа хидроцентрала не се земени предвид, односно се занемарени многу причини што се против градбата. Не е изработена адекватна студија за оправданоста за изградба, ниту пак е консултирано месното население, односно не е направена јавна дебата. Тоа се две клучни работи што се прескокнати, но и покрај тоа е издадена концесија за градба, со изговор дека оваа хидроцентрала ќе го подобри енергетскиот систем на Македонија. Се работи за мала хидроцентрала од 606 киловати, што е незначителна количина на електрична енергија која нема битно да го подобри квалитетот на енергетскиот систем, а ќе направи поголема штета на месното население, истакна Благој Анакиевски, член на Здружението за подобрување на квалитетот на животот во Блатец.
За да може да функционира, хидроцентралата ќе ја зафаќа водата во реката Блатешница и ќе ја спроведе во цевка со должина од три километри, што ќе предизвика еколошка катастрофа, оценуваат жителите на Блатец. Освен тоа, на трасата каде што ќе поминува цевката се наоѓа и зафатот за водоводот во селото, поради што се сомневаат дека ќе останат без вода за пиење, односно ќе се нарушат подземните текови и ќе дојде до пресушување на чешмите или заматување на водата.
Барањето на Здружението доби едногласна поддршка од присутните членови на Советот на Општина Виница на 45. седница, но остана отворена дилемата дали се исцрпени сите правни можности и мерки против градбата на објектот. Жителите се заканија дека остануваат на своите ставови и се подготвени и на поригорозни постапки за да не дозволат никакви градежни активности.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
