Последниот обилен дожд им создаде проблеми на дел од жителите во населбата Прокарка, на крајниот јужен дел од улицата „Роза Петрова“ во Кочани. Големите количини вода што овде се слеваат од сите страни се сериозна закана од поплавување на домовите и дворните површини, а неисчистените сливни решетки и исфрлениот шут, гранки и други отпадоци во околината на улицата дополнително го попречуваат истекувањето.
Жителите велат дека не им е првпат да се соочуваат со вода којашто во дворовите и на улицата создава езеро преку кое не може да се помине ниту пеш, ниту со возило.
-При секој дожд овде кај нас има поплава. Од сите страни влегува вода, се враќа од фекалната канализација, а на улицата имаме две шахти, но од нив излегува отпадна вода, па се создава езеро. Дури и преку оградниот ѕид се прелева водата со фекалии и влегува во дворот, затоа што нема каде да истекува. После секој дожд морам темелно да исчистам овде, за да можат децата да се движат, затоа што од бактерии и вируси не можеме глава да дигнеме, нон-стоп се болни. Сето тоа е од канализацијата. Ниту сливната решетка за атмосферската вода не беше исчистена и јас морав да ја чистам кога престана дождот, затоа што водата не се повлекуваше. Нема доаѓано багер, а надолу од улицата има ѓубре. Секој кој што му пречи дома, трева, гранки, го фрла таму и придонесува за сето тоа, истакна Љубица Јанкова, жителка на улицата „Роза Петрова“.
На асфалтната површина каде после секој дожд има мини езерце, и по последното повлекување на водата видливи се трагите на нивото што таа го достигнала.
Остатоците од песок, камења и отпадоци што надојдената вода ги оставила на коловозот сведочат дека местото е најниска точка во овој дел од градот. Поради тоа неопходно е надлежните општински служби да изработат проект за одвод на атмосферската канализација со соодветен пречник, што ќе обезбеди истекување на поголеми количини вода. Во спротивно ќе се соочат со тужби и барања за надомест на материјалната штета.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
