Со пригодна свеченост што ја организираше Доброволното противпожарно друштво – Кочани беше означено завршувањето на проектот за психолошка помош за образовната заедница по трагичниот пожар во клубот „Пулс“, а што се реализираше со поддршка од Амбасадата на Германија.
Пред претставниците од образовните институции во општина Кочани беше нагласено дека проектот се одвиваше во две фази во соработка со македонскиот Црвен крст и со Комората на психолози.
-Со свои тимови од 30-тина психолози спроведе 23 обуки за прва психолошка помош во средните и основните училишта, и во детската градинка „Павлина Велјанова“ каде што беа опфатени сите наставници, целиот наставен кадар како и техничкиот персонал. Во втората фаза ние од Доброволното противпожарно друштво, заедно со Црвениот крст од Кочани спроведовме две различни обуки – прва помош и практично и теоретско предавање за користење на противпожарни апарати и за нивната намена. Во сите овие обуки се опфатени ученици од средните училишта, околу 1.100 ученици од прва до четврта година, како и наставниот и техничкиот кадар на овие две училишта, околу 150 професори и технички кадар, истакна Златко Илијев, претседател на ДПД – Кочани.
На завршната свеченост на проектот присуствуваше и амбасадорката на Германија, Петра Дрекслер која истакна дека постои поврзаност меѓу граѓаните на двете држави, а тоа е потребата за солидарност.
-Иако директно не сме погодени, сепак има една врска којашто нѐ поврзува, а тоа е врската на човечноста којашто нѐ потсетува дека одговорноста не завршува на границите на еден град или на една држава или пак не завршува кај надлежностите на една институција. Тоа е врската којашто нас нѐ оспособува, ни дава можност да бидеме солидарни, да можеме заедно да погледнеме кон иднината, без да заборавиме, но повторно со волја, со стабилност, со надеж и со храброст да сакаме да изградиме нешто. Токму тоа е нашиот германски придонес, да се создаде простор во којшто ќе биде можно да се зборува за она што тежи, за она што притиска, да може да се подредат чувствата и да се прифати помошта, истакна амбасадорката Дрекслер.
Германската амбасадорка додаде дека и по завршувањето на овој проект соработката и поддршката ќе продолжат.
На свеченоста свои искуства од активностите во изминатиот период споделија и учесниците во проектот.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
