Драстично опаѓање на бројот на учениците во основните и средните училишта во четирите општини од регионот е регистрирано во изминатата деценија, односно недостасуваат една петина од основците и една третина од средношколците.
Според истражувањето на Центарот за граѓански комуникации од Скопје, за десет години во Кочани бројот на ученици во основните училишта се намалил за 16 отсто, односно од 2.987 во учебната 2014/2015, минатата учебна година имало 2.510 основци. Опаѓањето во средните училишта е двојно поголемо и изнесува 34 отсто, односно од 1.582 средношколци пред десет години, лани имало 1.042.
Сличен тренд имало и во општина Виница, каде во основните училишта за една деценија недостасуваат скоро 20 отсто од учениците. Овде пред 10 години имало 1.410 основци, а минатата учебна година основно образование посетувале 1.133 ученици, односно близу 20 отсто помалку. Во средното училиште во Виница, намалувањето е на исто ниво како во Кочани – 34 отсто, односно од 590 во 2014/2015, на 390 средношколци минатата година.
Најголем пад на бројот на ученици во основно образование има во општина Зрновци. Намалувањето е 26 отсто, односно од 200 пред десет години, лани имало 148 основци. И во Чешиново-Облешево има серизно опаѓање на учениците, од 465 во 2014/2015 на 364 претходната учебна година, што е 22 отсто помалку.
Во однос на наставниот кадар во основните и средните училишта забележливо е дека намалувањето не е со истата динамика со бројот на учениците. Во основното образование во општина Кочани пред една деценија имало 256 наставници, а лани 239, додека во средните училишта од 146 професори, минатата година на работа останале 121.
Во Виница бројот на наставници опаднал од 179 на 149, а на професорите од 61 на 53. И во Чешиново-Облешево се намалил бројот на наставниците од 95 на 88, а само во Зрновци имало зголемување од 32 на 34.
На државно ниво само за десет години бројот на ученици во основните и во средните училишта е намален за 27 илјади, односно за 10 отсто.
Податоците во истражувањето на Центарот за граѓански комуникации од Скопје се добиени од Државниот завод за статистика.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
