Сопствениците на земјоделски површини што во јуни и јули 2023 година беа зафатени од поплави и врнежи од град, а посевите им беа целосно уништени, сè уште не добиле обесштетување.
Според извештаите, односно елаборатите што ги изготви Комисијата за процена и утврдување на висина на штети од природни непогоди и други несреќи на земјоделски посеви на подрачјето на Општина Кочани, од поплавите настрадале близу 12 хектари главно засеани со пипер и пченка, а проценетата штета изнесува нешто повеќе од 2,3 милиони денари. Обилните врнежи од град пак, зафатиле површина од 82 хектари, во најголем дел засеани со пченка, пипер, ориз и лозја, а вредноста на штетата е проценета на околу 8 милиони денари.
За извештаите на Комисијата се дискутираше на денешната седница на Советот на Општина Кочани, при што беше нагласено дека поради нова методологија што е донесена од Владата, направено e раздвојување на проценките за штетите од двете елементарни непогоди.
-Ваквото раздвојување има мала нелогичност, затоа што поплавата е на 23 јуни, а на 23 јули има елементарна непогода од град. За моментот на афект од водената стихија, а потоа и штетата од градот, потребно е да помине одреден период за да се видат последиците. Така налага методологијата, но во интерес на земјоделците, за што побрзо да добијат обесштетување, нема да се допишуваме со комисијата на Владата, туку одиме со раздвојување на одлуките, за побрзо да ги добијат средствата. Претходно Советот изгласа одлука за збирен извештај за штетите од поплавите и од град заедно. Елаборатите се изработени од наша страна, а колкав процент ќе се исплати во однос на тие елаборати одлука донесува Комисијата за процена на штети при Владата, истакна Зоран Зафиров, претседател на Комисијата за процена и утврдување на висина на штети од природни непогоди и други несреќи на земјоделски посеви на подрачјето на Општина Кочани.
По доставувањето на извештаите за земјоделските штети од елементарните непогоди до владината комисија за проценка, одобрените финансиски средства од државниот буџет треба да се префрлат на сметка на Општината, а дури потоа таа ќе може да ја изврши исплатата кон земјоделците. Кога и во колкав износ целата постапка ќе се комплетира, за сега е непознато.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
