Се смирува состојбата по поплавите што го зафатија подрачјето на општина Чешиново-Облешево, а заканите од нови излевања на речните корита се веќе под контрола.
Изутрината состанок одржал општинскиот Кризен штаб, на кој присуствувале и претставници од Дирекцијата за заштита и спасување, од Црвен крст, МВР и од Центарот за јавно здравје од Кочани, при што биле дадени насоки за натамошните постапки.
-Во договор со Црвениот крст ќе направиме акција за доставување вода за пиење, затоа што најголемиот проблем во моментот во општина Чешиново- Облешево, бидејќи нема сопствени извори и водоводни мрежи, изворите од коишто се снабдува со вода населението се веќе загадени и неопходно е да се достави пивка вода до секој од домовите што се зафатени од поплавата. Исто така, морам да истакнам голема благодарност до компанијата „Бехтел и Енка“ коишто го прифатија повикот и барањето што го доставивме до нив, во најбрз можен рок ќе излезат на терен со тешка механизација и ќе пристапат кон расчистување на течението на Кочанска Река од којашто настана целиот овој проблем. Го формиравме Кризниот штаб за точно да ги лоцираме потребните точки коишто ја прават целокупната штета, во една од нив е и тој Бугарски канал каде што со соодветна механизација ќе се пристапи на терен и ќе бидат исчистени во најбрз можен рок, истакна градоначалникот на Општина Чешиново-Облешево, Јорданчо Костадинов.
Како превентива од можни заразни заболувања ќе се направи и дезинфекција на јавните простории, пред сѐ во училиштата.
-Наставата во училиштата се одвива во нормални услови, затоа и го повикавме Центарот за јавно здравје, бидејќи тие се надлежни како институција да направат дезинфекција на територијата што беше зафатена од поплавите. Веднаш штом ќе се создадат услови за да се пристапи кон таква акција, во договорот со нив, ќе се направи дезинфекција на потребните објекти и земјиште, превентивно за да не дојде до некои бактериолошки загадувања, додаде Костадинов.
Во меѓувреме граѓаните почнале да поднесуваат пријави за штета од поплавите.
-Уште од утринските часови граѓани коишто се засегнати директно од поплавите веќе доаѓаат во Општината и поднесуваат барања за обештетување од поплавите. Дополнително, комисијата ќе ги сондира сите тие барања и ќе излезе на терен да ги попише вистинските состојби од настанатата штета, истакна Костадинов.
Градоначалникот Костадинов веќе апелираше за итна помош од државата, бидејќи општинските ресурси се недоволни за справување со обемот на штетите.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
