Македонското еколошко друштво спроведе пребројување на штрковите на национално ниво, а пописот е спроведен во рамки на осмиот Европски цензус на штркови што се прави на секои 10 години, а во Македонија првпат се спроведе во 2014 година.
При истражувањето во Македонија беа вклучени над 15 членови и волонтери на МЕД, а евидентирани се вкупно 1.765 гнезда на штркови од кои 1.388 се активни , односно во нив се извеле млади. Вкупниот број на изведени штркчиња е 3,934.
Штрковите најчесто ги населуваат рамничарските региони и најголем дел од гнездата се лоцирани во населените места. Како региони со најмногу гнезда на штркови се издвојува Пелагонија, каде има вкупно 1,170 млади единки, а потоа следуваат Кочанско Поле и Овче Поле со 707 млади птици.
Најголем број гнезда се наоѓаат на столбови за електрична енергија и за јавно осветлување, околу 76% од сите гнезда, како и на кровови на куќи – 18%.
Во споредба со цензусот на штркови направен во 2015 година забележано е зголемување на популацијата на штркови, односно, бројот на активни гнезда од 837 пораснал на 1388, што е пораст за 60% за период од 10 години. Од друга страна, годинава се извеле 49% повеќе млади споредено со 2014 година.
Популацијата на белите штркови расте во цела Европа. Ваквиот пораст на бројноста на белите штркови се дилжи на успешноста на имплементираните мерки за заштита на штрковите, намалениот притисок од земјоделството, но и климатските промени играат важна улога бидејќи сега штрковите полесно наоѓаат храна во зимски услови, па така им се намалува и миграторниот пат.
Овие резултати укажуваат на потребата за понатамошна заштита и мониторинг на штрковите во Македонија, како и за имплементација на стратегии за заштита на нивните живеалишта.
МЕД и понатаму ќе продолжи со следење на состојбата на штрковите и информирање на јавноста за потребата од зачувување на нашата природна средина.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
