Дел од старите и распаднати куќи во старото Крушарско Маало наскоро и физички ќе исчезнат и ќе останат само во сеќавањата на повозрасните жители. Општина Кочани веќе објави јавен повик со кој бара фирма која треба да ги сруши објектите, а теренот да го подготви за пробивање и изградба на нови улици.
Според актуелниот Детален урбанистички план, просторот што е на атрактивна локација во централното градско подрачје, треба да добие една поголема и една помала сообраќајница, на местото на постојните улици „Гемиџии“ и „23 Октомври“.
-Потребно е да се изврши уривање на постоечките објекти на двете улици и машинско пробивање во вкупна должина од 360 метри, ширина од 10 метри и длабочина од 40 сантиметри на терен од трета и четврта категорија, со утовар и транспорт на материјалот од уривањето и пробивањето, до градската депонија на оддалеченост од 7 километри, се истакнува во спецификацијата на тендерската постапка.
Од Секторот за располагање и уредување на градежното земјиште на Општина Кочани информираа дека скоро целосно е завршена експропријацијата на старите куќи и земјиштето каде што ќе се реализираат активностите.
Со пробивањето на сообраќајниците треба да се добие ново поврзување на улиците „Маршал Тито“ и „Димитар Влахов“, на правецот откај мостот спроти Поштата до стариот влез во Општата болница. Исто така, соодветен пристап ќе добијат и новоизградените колективни станбени згради на улицата „Димитар Влахов“.
Јавниот повик за пријавување на заинтересираните фирми, од кои ќе се избере најповолниот изведувач на градежните работи, трае до 4 септември. По изборот ќе биде склучен договор според кој рушењето на куќите и подготовката на теренот ќе треба да се заврши во период од 5 месеци. За реализација на градежните работи од општинскиот буџет се планирани 700 илјади денари, без данокот на додадена вредност.
© 2024 Текстовите и другите содржини се сопственост на Канал 8 телевизија. Секое нивно целосно или делумно преземање, користење или реемитување е дозволено само со претходна согласност од сопственикот.
