Здружението „Еко Тим Исток“ од Кочани заедно со младинските совети од двете средни училишта почна со реализација на проектот „Од младите за младите“, што како младинска иницијатива е во рамки на „Регионалната програма за локална демократија на Западен Балкан 2 – ReLOaD2“. Иницијативата е финансирана од Европската унија, а ја спроведува Програмата за развој на Обединетите нации (УНДП). Како кофинансиер во реализацијата се јавува и Општина Кочани.
Главна цел на проектот е поддршка на активности за поголема вклученост на младите во општината преку младинскиот активизам и волонтеризам. Целна група ќе бидат минимум 30 млади, членови на младинските совети од двете средни училишта во Кочани.
Проектната иницијатива се однесува на осмислување и уредување на младинско катче – од младите за младите, што ќе биде место за престој и дружење на младите од грдот и пошироко.
-Освен на ниво на училиште, во моментот младите во Кочани не се вклучуваат во акции и активности кои се организирани или се во функција на одржување и развој општината или општински капацитети. Од друга страна пак, и двете средни училишта во Кочани секојдневно учествуваат на различни образовни натпревари и се добитници на голем број на награди и признанија за иновации, бизнис планови, натпревари во вештини што го поткрепува фактот за знаењата, креативноста и идеите што истите ги поседуваат. За таа цел, оваа проектна иницијатива се однесува на осмислување, изработка на реквизити и уредување на место за одмор и релаксација, односмо мини парк на просторот на поранешното пазарче во населбата Стришани, во кое главни учесници ќе бидат младите со свој ангажман на волонтерска основа, истакна Ирена Мирчовска, координаторка на проектот.
Очекувани резултати од проектот се да се мобилизираат младите од младинските совети во средните училишта и младински активизам, да се уреди просторот во катче за одмор и дружење и да има зголемена видливост за придобивките на општината од младински активизам и волонтеризам.
©2011 - 2026 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
