Општина Зрновци доби мурал што го изработија дваесетина млади од Облешево, Чифлик, Зрновци, Кочани, Кучичино и Мородвис во рамки на програмата „Креативни активистички интервенции“ на „Еквалис“.
Муралот е изработен со слоганот „Алкохолот е пречка на патот“, со цел кревање на свеста за безбедноста во сообраќајот.
Идејата се родила низ повеќекратни консултации со локални активисти и млади од регионот кои утврдиле дека безбедноста во сообраќајот е едно од најзначајните прашања за локалното население. Муралот е насликан на надворешниот ѕид на соблекувалната на фудбалскоот игралиште, а автор на делото е Марио Дејанов од Зрновци.
-Муралот го изработивме во техниката акрил, а е со мотивот „Алкохолот е пречка на патот“ и воедно тој е прв мурал во општина Зрновци, истакна Дејанов.
-Јас ја претставувам Општинската организација на Црвен крст – Кочани и во овој проект се вклучив за да научам нешто повеќе за сообраќајот, односно да ја упатиме пораката до возачите да не консумираат алкохол додека управуваат со моторното возило, рече Магдалена Алексова, волонтерка во Општинакта организација на Црвен крст – Кочани.
Пред да биде изработен муралот, учесниците имаа и работилница што беше посветена на црниот биланс на сообраќајните несреќи во Македонија како сериозен општествен проблем.
-Целта на работилницата беше да извршиме сообраќајна едукација на младите, односно да ја подигнеме нивната свест за тоа како поодговорно, посовесно и побезбедно да се однесуваат во сообраќајот на патиштата. Нашата првична намера беше да се актуелизира локалниот проблем за континуираниот пораст за сообраќајни незгоди со тешки телесни повреди и смртни последици случени на патиштата во Источна македонија, истакна Викторија Тасева, правничка.
Градоначалникот Борчо Коцев оцени дека муралот е одлично дело со порака испратена до секого.
-Дел од младите од општините Чешиново-Облешево, Зрновци и Кочани, испратија силна порака за безбедноста во сообраќајот. Со ова порачуваме дека возрасните треба да внимаваат во сообраќајот за доброто на сите учесници, истакна Коцев.
Активноста во општина Зрновци е дел од пошироката програма „Креативни активистички интервенции“ на Здружението „Еквалис“, а нејзина цел е да ги таргетира локалните проблеми со кои се соочуваат луѓето во општините.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
