Над 500 дечиња денеска беа дел од овогодишната Бадникова поворка што по традиција се одржува како најава на големиот христијански празник Божик.
Коледарчињата ја пееја возобновената христијанска песна „Вечниот Бог“ и со ѕвезди во рацете го најавија Христовото раѓање.
Поворката тргна од православниот храм „Св. Георги“ носејќи ја симболичната бадникова пештера и се движеше по улиците во централното подрачје.
Пред зградата на Општина Кочани ги пречека градоначалникот Љупчо Папазов кој им ги честиташе празниците и ги даруваше со пригодни подароци.
-Драги дечиња, Ви благодарам за можноста заедно со вашата песна и поворка, со вашата масовност, со присуството, да го најавиме доаѓањето на Богомладенецот. Благодарност и до отецот Димитар Арсовски кој интензивно работеше со вас овие денови и ја подготви оваа убава глетка. Во оваа прилика ви ги честитам новогодишните и божикните празници, ви посакувам мирно детство, успешно школување во вашето натамошно образование, да бидете добри луѓе, да ја чувате верата и да бидете погласни, нека ве чуе целиот град. Да сте живи и здрави, порача Папазов.
Бадниковата поворка продолжи кон Паркот на Револуцијата каде дечињата добија подароци и пред присутните граѓани ја пееја песната посветена на Божик, најавувајќи ја радосната вест за раѓањето на Христос.
Децата во поворките ги симболизираат ангелите што го најавуваат Христовото Раѓање, а ѕвездичките во нивните раце се симболични водилки кон местото каде што се родил Богомладенецот.
©2025 Текстовите и другите содржини се сопственост на Канал 8 ИПТВ.
Не е дозволено нивно целосно или делумно преземање, користење или реемитување.
